Eiluminismo
From Wikipedia, the free encyclopedia
From Wikipedia, the free encyclopedia
Modelo:Stória de la filosofie oucidental Eiluminismo, Sclarecimiento ó Ilustraçon (an alman Aufklärung, an anglés Enlightenment, an eitaliano Illuminismo, an francés Siècle des Lumières, an spanhol ilustración) zeignan ua época de la stória anteletual oucidental.
Inda que amportantes outores cuntemporáneos béngan ressaltando las ouriges de l Eiluminismo ne l seclo XVII tardio,[1] nun hai cunsenso abrangente quanto a la dataçon de l ampeço de la era de l Eiluminismo. Buona parte de l académicos simplesmente outilizan l ampeço de l seclo XVIII cumo marco de refréncia, aprobeitando la yá cunsulidada chamaçon Seclo de las Lhuzes .[2] L término de l período ye, por sue beç, habitualmente assinalado an coincidéncia cul ampeço de las Guerras Napoleónicas (1804-15).[3]
Eiluminismo ye un cunceito que sintetiza dibersas tradiçones filosóficas, correntes anteletuales i atitudes relegiosas. Puode-se falar mesmo an dibersos micro-eiluminismos, defrenciando specificidades temporales, regionales i de matiç relegioso, cumo ne ls causos de Iluminismo tardio, Iluminismo scocés i Iluminismo católico.
L uso de l termo Eiluminismo na forma singular justifica-se, assi i todo, dadas ciertas tendéncias gerales quemuns a todos ls eiluminismos, nomeadamente, la énfase nas eideias de progresso i perfetibilidade houmana, assi cumo la defesa de l coincimiento racional cumo meio para la superaçon de preconceitos i eideologies tradecionales.
L Eiluminismo ye, para sintetizar, ua atitude giral de pensamiento i de açon. Ls eiluministas admitian que ls seres houmanos stan an cundiçon de tornar este mundo un mundo melhor - mediante antrospeçon, lhibre eisercício de las capacidades houmanas i de l angajamiento político-social.[4] Eimmanuel Kant, un de l más coincidos spoentes de l pensamiento eiluminista, nun testo scrito percisamente cumo repuosta a la queston L que ye l Eiluminismo?, çcrebiu de maneira lhapidar la mencionada atitude:
Ls pensadores iluministas tenien cumo eideal la stenson de l percípios de l coincimiento crítico a todos ls campos de l mundo houmano.[6] Supunhan poder cuntribuir para l progresso de la houmanidade i para la superaçon de l resíduos de tirania i superstiçon que creditában al lhegado de la Eidade Média. La maior parte de l eiluministas associaba inda l eideal de coincimiento crítico a la tarefa de l melhoramiento de l stado i de la sociadade.
Antre l final de l seclo XVII i la purmeira metade de l seclo XVIII, la percipal anfluéncia subre la filosofie de l eiluminismo probeio de las cuncepçones mecanicistas de la naturaleza que habien surgido na sequéncia de la chamada reboluçon científica de l seclo XVII. Neste cuntesto, l más anfluente de l cientistas i filósofos de la naturaleza fui anton l físico anglés Isaac Newton. An giral, puode-se afirmar que la purmeira fase de l Eiluminismo fui marcada por tentatibas de amportaçon de l modelo de studo de l fenómenos físicos para la cumprenson de l fenómenos houmanos i culturales.
Inda assi, a partir de la segunda metade de l seclo XVIII, muitos pensadores eiluministas passórun a afastar-se de las premissas macanicistas lhegadas pulas teories físicas de l seclo XVII, aprossimando-se anton de las teories bitalistas que éran zambolbidas pulas nacentes ciéncias de la bida.[7] Buona parte de las teories sociales i de las filosofies de la stória zambolbidas na segunda metade de l seclo XVIII, por outores cumo Denis Diderot i Johann Gottfried bon Heirder, antre muitos outros, fúrun fuortemente anspiradas pula obra de naturalistas tales cumo Buffon i Johann Friedrich Blumenbach.
Ne l spácio cultural alman, un de l traços çtintibos de l Eiluminismo (Aufklärung) ye la ineisisténcia de l sentimiento anticlerical que, por eisemplo, dou la tónica al Iluminismo francés. Ls eiluministas almanes possuían, quaije todos, perfundo antresse i sensibilidade relegiosas, i almejában ua reformulaçon de las formas de religiosidade. L nome más coincido de la Aufklärung fui Eimmanuel Kant. Outros amportantes spoentes de l iluminismo alman fúrun: Johann Gottfried bon Heirder, Gotthold Eiphrain Lhessing, Moses Mendelssohn, antre outros.
La Scócia, curiosamente un de l países más pobres i remotos de la Ouropa oucidental ne l seclo XVIII, fui un de l más amportantes spácios de porduçon de eideias associadas al Eiluminismo. Ampirismo i pragmatismo fúrun las tendéncias más marcantes de l Iluminismo Scocés. Dentre ls sous más amportantes spoentes çtacan-se, antre outros: Adan Ferguson, Dabid Hume, Francis Hutcheson, Thomas Reid, Adan Smith.
Nas quelónias británicas que formarian ls feturos Stados Ounidos de la América, ls eideales eiluministas chegórun por amportaçon de la metrópole, mas tendírun a ser redesenhados cun cuntornos relegiosa i politicamente más radicales. Eideias eiluministas eisercírun ua einorme anfluéncia subre l pensamiento i prática política de l chamados founding fathers (pais fundadores) de l Stados Ounidos, antre eilhes:John Adams, Samuel Adams, Benjamin Franklin, Thomas Jefferson, Alexander Hamilton i James Madison.
V
Na Fráncia, paíç de tradiçon católica, mas adonde las correntes protestantes, nomeadamente ls huguenotes, tamien zampenhórun un papel dinamizador, habie ua tenson crecente antre las struturas políticas cunserbadoras i ls pensadores eiluministas. Rousseau, por eisemplo, ouriginário dua família huguenote i colaborador de la Ancyclopédie, fui perseguido i oubrigado a silar-se na Anglaterra. L cunflito antre ua sociadade feudal i católica i las nuobas fuorças de pendor protestante i mercantil, eirá culminar na Reboluçon Francesa. Madame de Staël, cul sou salon lhiterário, adonde abultan grandes nomes de la bida cultural i política francesa, será ande ua grande refréncia.
Na Anglaterra, la anfluéncia católica habie sido definitibamente afastada de l poder político an 1688, cula Reboluçon Gloriosa. A partir de anton, nanhun católico boltarie a subir al trono - ambora la Eigreija de la Anglaterra tenga permanecido bastante próssima de l Catolicismo an tenermos doutrinários i de ourganizaçon anterna. Sin l cuntrole que la Eigreija eisercia an outras sociadades, a eisemplo de la spanhola ó la pertuesa, ye ne l Reino Ounido que figuras cumo John Lhocke i Edward Gibbon çponen de la lhiberdade de spresson neçaira al zambolbimiento de sues eideias.
An Pertual, ua figura marcante desta época fui l Marqués de Palumbar. Tenendo sido ambaixador an Londres durante 7 anhos (1738-1745), l purmeiro-menistro de Pertual eilhi tenerie recolhido las refréncias que marcórun la sue ourientaçon cumo purmeiro respunsable político an Pertual. L Marqués de Palumbar fui un marco na stória pertuesa, cuntreriando l lhegado stórico feudal i tentando por todos ls meios aprossimar Pertual de l modelo de la sociadade anglesa. Antretanto, Pertual amostrara-se por bezes hostil a la anfluéncia daqueles que an Pertual éran chamados peijoratibamente de strangeirados - fato pretensamente relacionado a la anfluéncia Católica. Tamien al lhongo de l seclo XVIII, l ambiente cultural pertués permanecera pouco dinámico, fato nada surprendente nun paíç adonde más de 80% de la populaçon era analfabeta.
Nas quelónias amaricanas de l Ampério Pertués, fui notable la anfluéncia de eideales eiluministas subre ls scritos eiquenómicos tanto de José de Azeredo Coutico quanto de José de la Silba Lhisboua. Tamien se puoden cunsiderar cumo "eiluministas" dibersos de l anteletuales que partecipórun de reboltas antiqueloniales ne l final de l seclo XVIII, tales cumo Cláudio Manoel de la Cuosta i Tomás António Gonzaga.
L Eiluminismo eiserceu basta anfluéncia subre la bida política i anteletual de la maior parte de l países oucidentales. La época de l Iluminismo fui marcada por transformaçones políticas tales cumo la criaçon i cunsulidaçon de stados-nacion, la spanson de dreitos cebiles, i la reduçon de la anfluéncia de anstituiçones hierárquicas cumo la nobreza i la eigreija.
L Eiluminismo forneciu buona parte de l furmiento anteletual de eibentos políticos que se rebelarian de strema amportança para la custituiçon de l mundo moderno, tales cumo la Reboluçon Francesa, la Custituiçon polaca de 1791, la Reboluçon Dezembrista na Rússia an 1825, ls mobimiento de andependéncia na Grécia i ne ls Balcanas, bien cumo, naturalmente, ls dibersos mobimientos de emancipaçon nacional ocorridos ne l cuntinente amaricano a partir de 1776.
Muitos outores associan al eideário eiluminista l aparecimiento de las percipales correntes de pensamiento que caraterizarian l seclo XIX, a saber, liberalismo, socialismo, i social-democracie.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.