Eislan
From Wikipedia, the free encyclopedia
L Eislan (de l árabe الإسلام, transl. al-Islān) ye ua religion monoteísta que apareciu na Península Arábica ne l seclo VII, baseada ne ls ansinamientos religiosos de l porfeta Maomé (Muhammad) i nua scritura sagrada, l Alcoron. La religion ye coincida inda por Eislamismo.
Na bison muçulmana, l Eislan apareciu zde la criaçon de l home, ó seia, zde Adon, sendo este l purmeiro profeta dentre muitos outros, pa dibersos pobos, sendo l redadeiro deilhes Maomé.[1]
Cerca de duzientos anhos apuis de Maomé, l Eislan yá se tenie difundido an todo l Médio Ouriente, ne l Norte de África i na península Eibérica, bien cumo na direçon de la antiga Pérsia i Índia. Más tarde, l Eislan atingiu la Anatólia, ls Balcanas i la África susaariana. Recentes mobimientos migratórios de populaçones muçulmanas ne l sentido de la Ouropa i de l cuntinente amaricano lhebórun al aparecimiento de quemunidades muçulmanas nestes territórios.[2]
La mensaige de l Eislan carateliza-se pula sue simplecidade: pa atingir la salbaçon basta acraditar nun único Dius, rezar cinco bezes por die, submetener-se al ayuno anual ne l més de l Ramadon, pagar dádibas rituales i fazer, se possible, ua peregrinaçon a la cidade de Meca.
L Eislan ye bisto puls sous aderentes cumo un modo de bida que anclui anstruçones que se relacionan cun todos ls aspetos de la atebidade houmana, séian eilhes políticos, sociales, eiquenomicos, lhegales, melitares ó anterpessonales. La çtinçon oucidental antre l spritual i temporal ye, an teorie, alhena al Eislan.