Grande Depresson
From Wikipedia, the free encyclopedia
La Grande Depresson, tamien chamada por bezes de Crise de 1929, fui ua grande depresson eiconómica que tubo ampeço an 1929, i que persistiu al lhongo de la década de 1930, treminando solo cula Segunda Guerra Mundial. La Grande Depresson ye cunsidrada l pior i l más lhongo período de recesson eiconómica de l seclo XX. Este período de depresson eiconómica causou altas taxas de zamprego, chimpas drásticas de l produto anterno bruto de dibersos países, bien cumo chimpas drásticas na porduçon andustrial, précios de açones, i an praticamente to medidor de atebidade eiconómica, an dibersos países ne l mundo.
L die 24 de Outubre de 1929 ye cunsidrado popularmente l ampeço de la Grande Depresson, mas la porduçon andustrial amaricana yá habie ampeçado a caer a partir de Júlio de l mesmo anho, causando un período de lhebe recesson eiconómica que se stendiu até 24 de outubre, quando balores de açones na bolsa de balores de Nuoba Iorque, la New York Stock Exchange, caíran drasticamente, zancadenando la Quinta-Feira Negra. Assi, miles de acionistas perdírun, lhiteralmente de la nuite pa l die, grandes somas an denheiro. Muitos perdírun todo l que tenien. Essa quebra na bolsa de balores de Nuoba Iorque piorou drasticamente ls eifeitos de la recesson yá eisistente, causando grande anflaçon i queda nas taxas de benda de perdutos, que por sue beç oubrigórun l fechamiento de einúmaras ampresas comerciales i andustriales, eilebando assi drasticamente las taxas de zamprego. L colapso cuntinou na Segunda-feira negra (l die 28 de Outubre) i Terça-feira negra (l die 29).
Ls eifeitos de la Grande Depresson fúrun sentidos ne l mundo anteiro. Estes eifeitos, bien cumo sue antensidade, bariórun de paíç la paíç. Outros países, para alhá de ls Stados Ounidos, que fúrun duramente atingidos pula Grande Depresson fúrun la Almanha, Austrália, Fráncia, Eitália, l Reino Ounido i, specialmente, l Canadá. Mas, an ciertos países pouco andustrializados naqueilha época, cumo la Argentina i l Brasil (que nun cunseguiu bender l café que tenie para outros países), la Grande Depresson acelerou l porcesso de andustrializaçon. Praticamente nun houbo nanhun abalo na Ounion Sobiética, que tratando-se dua eiquenomie socialista, staba eiconómica i politicamente cerrada pa l mundo capitalista. Ls eifeitos negatibos de la Grande Depresson atingiran sou ápice ne ls Stados Ounidos an 1933. Neste anho, l Persidente amaricano Franklin Delano Roosevelt aprobou ua série de medidas coincidas cumo New Deal.
Essas políticas eiconómicas, adotadas quaije simultaneamente por Rosebelt ne ls Stados Ounidos i por Hjalmar Schaat[1] na Almanha fúrun, trés anhos más tarde, racionalizadas por Keynes an sue obra clássica[2].
L New Deal, juntamente cun porgramas de ajuda social rializados por todos ls stados amaricanos, ajudou a minemizar ls eifeitos de la Depresson a partir de 1933. La maiorie de l países atengidos pula Grande Depresson passórun a recuperar-se eiconomicamente a partir de anton. An alguns países, la Grande Depresson fui un de ls fatores purmários que ajudórun la ascenson de regimes de strema-dreita, cumo ls nazis comandados por Adolf Hitler na Almanha. L ampeço de la Segunda Guerra Mundial treminou cun qualquiera eifeito remanescente de la Grande Depresson ne ls percipales países atingidos.