Hoksebarge

Hoksebarge of Wakkesbaaign^[1] (Nederlaands: Haaksbergen) is ne gemeante en n doarp in t zuudn van Tweante, in de proveensie Oaveriessel. De gemeante har per 1 jannewoari 2020 24.309 inwonners (bron: CBS) en lig noa an Hengel (11 km) en Eanske (12 km). De totale öppervlakte is 105,55 km² (woarvan 0,27 km² water). De gemeante Hoksebarge, dee zik de Ster van Tweante neumt, maakt deel oet van t koaderwetgebeed Regio Tweante.

Gemaente Hoksebarge
(Vlagge van Hoksebarge)	(Waopen van Hoksebarge)
Lokatie van de gemeante Hoksebarge
Informasie
Proveensie	Oaveriessel
Heufdplaatse	Hoksebarge
Geografie en bevolking
Öppervlakte  - Laand  - Water	105,48 km² 104,92 km² 0,56 km²
Inwonners Bevolkingsdichtheid	24.309 (1 jannewari 2020) 232 inw./km²
Koordinaten	52° 9′ N, 6° 45′ O52.1547222222226.7419444444444
Aoverig
Belangrieke verkeersaoders	N18, N347
Netnummer	053
Postkode	7480-7489
Offisiële webstie www.haaksbergen.nl

Oaverige kerne

Brammel, Buurse, Epnzoalder, Holthuuzn, Honesch, Langel, de Hoeve (ontstoan in 1927) en Stepel.

Geskiedenisse

De eerste inwonners van binn de hudige gemeentegreanzn kömn zon betn roond 800 v. Kr. noabie Buurse an de Buursebekke te wonn. t Doarp Hoksebarge onsteund völle later, um 800 noa Kristus, as boernestean vearderop an deezelfde bekke. Hier hebt ze n heulten kaarkjen op-egreawen oet ongevear 1000 n. Kr., wat n vuurgänger van de hudige St. Pankratiuskaarke was. Hoksebarge wörd t eerste eneumd as Hockesberge in 1188 op de goodernlieste van Groaf Hendrik van Dale, den't ook Deepn en Ahaus (kort oawer n poal in Duutslaand) har. An t begin van t 14de joarhoonderd kree'j de boermaarkes, dee't bleewn bestoan töt halverweage t 19de joarhoonderd. Oonder t gericht Hoksebarge völn de maarkes Brammel, Langel, Epnzoalder/Stepel, Holthuuzn, Bokel en Hoksebarge/Hoognes.

Um 1400 wör de Buursebekke, den't toertieds duur t doarp hen streumdn, verlegd en op t zuden van Hoksebarge an eslötn op de Skipbekke. Hierduur köm dr ne waterverbeending met n Iessel en ko'j oawer t water bie de haanzesteadn Deaventer, Zwolle en Zutfen komn.

In t 18de joarhoonderd wör dr ne koornmölle bouwd, den't ze n Koornbloom neumt.

Net as in aandere deeln van Tweante was dr in Hoksebarge vanof t 19de joarhoonderd völle textielnieverheaid. t Fabriek van D. Jordaan & Zonen leawerden völle woark vuur de inwonners. Op t heugtepeunt leup 80% van t Hoksebargse waarkvolk bie D. Jordaan. Begin zeuwntiger joarn stortn de textielnieverheaid in Tweante in, en dus ook in Hoksebarge.

Bekeande leu oet Hoksebarge

• Karel van de Kate - komiek
• Thomas Berge (1990) - volkszänger
• Bram Tankink (1978) - wielrenner
• Erik ten Hag - voetbalcoach

Oetgoande verwiezing

• Webstea van de gemeante Hoksebarge in t Tweants