Adrian Fisher

Adrian Fisher (2. september 1952–31. mars 2000)^[1] var ein engelsk gitarist og medlem av bandet Toby (ein avleggjar av bandet Free), Sparks og Boxer. Fisher spelte på dei to første Sparks-albuma dei gav ut på Island Records, Kimono My House og Propaganda.^[2]

Adrian Fisher
Adrian Fisher (andre frå høgre) med Sparks i 1974
Fødd	2. september 1952
Fødestad	Dulwich i London i England
Død	31. mars 2000 (alder 47) (47 år)
Dødsstad	Ko Samui i Thailand
Opphav	Storbritannia
Aktiv	1970-åra til 2000
Sjanger	Rock
Instrument	Gitar
Tilknytte artistar	Boxer, The Four Squares, Sparks, Toby
Verka som	Musikar

Før han vart med i Sparks, var Fisher medlem av Free-bassisten Andy Fraser sitt band, Toby (med trommeslagaren Stan Speake), og var ei kort stund med i det kortvarige bandet Brush, bandet til bassisten Brush Shiels (tidlegare Skid Row). Fisher vart med i Sparks i 1973 og spelte inn Kimono My House med dei det året. Han spelte på den påfølgjande turneen i 1974.^[3]

Etter at han fekk sparken frå Sparks vart Fisher med Mike Patto i bandet Boxer i 1977, og spelte inn albumet Absolutely for Epic Records. Fisher var òg ei kort stund med i Sparks-avleggjaren The Four Squares i lag med Dinky Diamond.^[3][4]

Seint i 1980-åra flytta han til Thailand og arbeidde som musikar i Ko Samui og i Bangkok.^[3]

Han døydde etter ein konsert den 31. mars 2000 i Ko Samui i Thailand av hjarteinfarkt.^[1]