Banff

Banff er ein by i provinsen Alberta i Canada. Banff er omkransa av fjell og er den høgastliggande byen i Canada. Banff ligg 126 kilometer vest for Calgary og 58 kilometer austom Lake Louise på den transkanadiske motorvegen.

For andre tydingar av oppslagsordet, sjå Banff i Skottland.

Banff
by
Land	Canada
Provins	Alberta
Areal	4,85 km²
Folketal	6 700
Tidssone	UTC −7
Banff 51.1781°N 115.572°W / 51.1781; -115.572
Wikimedia Commons: Banff, Alberta

Jarnbanestasjonen

Banff er eit av Canadas mest populære turistmål kjent for det omliggande fjellandskapet og dei varme kjeldene sine. To store skianlegg ligg i nærleiken av byen.

Historie

Dei første innbyggarane kom til Banff i 1880-åra, etter at jarnbana frå Atlanterhavet til Stillehavet vart lagt gjennom Bow Valley. I 1883 oppdaga tre jarnbanearbeidarar fleire varme kjelder i fjellsida til Sulphur Mountain. To år seinare vart eit 26 km² stort reservat oppretta rundt dei varme kjeldene og området vart promotert som eit internasjonalt ferie- og spa-anlegg for å auka kundegrunnlaget for den nye jarnbanelinja.^[1] I 1887 vart området utvida til 673 km² og kalla «Rocky Mountain Park». Dette vert rekna som ein av Canadas første nasjonalparkar.

Området fekk namnet Banff i 1884 etter Banffshire i Skottland, som var heimstaden til George Stephen, ein tidlegare direktør i Canadian Pacific Railway.^[2]

Banff sentrum utvikla seg rundt jernbanestasjonen som eit turistkontor for dei tilreisande til nasjonalparken. I 1985 kom Banff nasjonalpark inn på UNESCO si liste over verdsarv som ein av nasjonalparkane i Rocky Mountains.