Calothorax

Calothorax er ei biologisk slekt av fuglar i ordenen seglarfuglar (Apodiformes), i kolibrifamilien Trochilidae. Slekta omfattar berre to artar, begge er heimehøyrande i Nord-Amerika, med utbreiing frå det sørvestlege hjørnet av USA til det sørlege Mexico.

Calothorax
Luciferkolibri (Calothorax lucifer)
Systematikk
Rike:	Dyr Animalia
Rekkje:	Ryggstrengdyr Chordata
Underrekkje:	Virveldyr Vertebrata
Klasse:	Fuglar Aves
Orden:	Seglarfuglar Apodiformes
Familie:	Kolibriar Trochilidae
Underfamilie:	Trochilinae
Stamme:	Mellisugini
Slekt:	Calothorax G. R. Gray, 1840

Det maskuline slektsnamnet Calothorax kjem frå gresk: kalos som tyder «vakker», og thōrax som tyder «bryst».^[1]

Kjenneteikn

Kolibriane i denne slekta er ganske like kvarandre og måler mellom 8 og 9 cm i lengd. Dei har lange, svakt nedoverbøygde nebb. Hannane har relativt lange, tydeleg graderte stjertar. Dei er grøne på oversida og kvite på undersida, med ein purpur glinsande strupeflekk og mørkegrøne kroppssider. Hoene er beige på undersida og har bleike strek bak auga.^[2]

Systematikk og taksonomi

Slekta Calothorax vart føreslått av den britiske ornitologen George Robert Gray i 1840. Typearten som seinare vart definert, var Cynanthus lucifer, som i dag er kjend som luciferkolibri.^[2]

Artsoversyn

Slekt Calothorax i rekkjefølgje etter IOC World Bird List V15.1, 2025,^[3] med norske namn etter Norske navn på verdens fugler.^[4] Verdas naturvernunion, IUCN, har vurdert begge artane som livskraftige:^[5]

Bilete	Norsk namn	Vitskapleg namn	Autor	Utbreiing
	Luciferkolibri	Calothorax lucifer	(Swainson, 1827)
	Fagerkolibri	Calothorax pulcher	(Gould, 1859)