Fjellkurle

Fjellkurle (Chamorchis alpina) er ei plante i fjellkurleslekta Chamorchis i orkidéfamilien (marihandfamilien) Orchidaceae.^[1]

Fjellkurle
Status i verda: Livskraftig Status i Noreg: Nær truga
Systematikk
Rike:	Planteriket
Klasse:	Einfrøblada
Orden:	Aspargesordenen
Familie:	Orkidéfamilien
Slekt:	Chamorchis
Art:	C. alpina
Vitskapleg namn
Chamorchis alpina (Linné) Rich.
Økologi
Habitat:	kalkrikt fjellterreng
Utbreiing:	nordlege Europa, Alpane. Karpatane

Utsjånad

Fjellkurle er ei lita plante, som berre blir om lag 10 centimeter høg. Planta har blomar i grønt eller brunt i eit lite aks, som kan minne om ei lita grønkurle. Ved bakken veks det ein krans av smale blad rett opp, slik at dei når opp til eller over blomane.

Systematikk

Fjellkurle er den einaste arten i slekta.^[2]

Utbreiing

Fjellkurle veks på kalkrik grunn i fjellet, gjerne på reinrosehei. Eit sørleg utbreiingsområde omfattar dei nordlege delane av Jotunheimen, Trollheimen og Dovrefjell nord til Snåsa. Lenger nord er planta meir vanleg, og veks frå Hattfjelldal til Varangerhalvøya.^[3] Frå 2021 er ho komen med på Norsk raudliste for artar som nær truga (NT).^[4]

Arten finst òg i Sverige (status LC, svensk namn dvärgyxne)^[5] og i Finland (EN, finsk namn tunturiorho).^[6]