Copia

Copia er namnet på ei romersk gudinne som personleggorde overflod. Ho bar eit overflodshorn kjend som cornu copiae eller 'Copia sitt horn'. Dette inneheldt rikdom, grøde og alle gode gåver.^[1] Gudinna er tilknytt Fortuna, lukkegudinna som også ber overflodshorn, og har mange av dei same eigenskapane til Abundantia.^[2]

Mynt frå den romerske byen Copia (Thurium) med overflodshorn.

Det latinske ordet copia tyder 'rikeleg'. Det tydde også 'løyve, høve', og fekk gjennom uttrykk som copiam describendi facere, 'løyve til å gjera ein transkripsjon', mellomaldertydinga 'transkripsjon' og er opphav til det moderne ordet kopi.^[3]

Copia var også namnet på ein romersk by bygd over ruinane til den rike greske byen Sybaris som låg sør i dagens Italia, mellom elvane Crathis (Crati) og Sybaris (Coscile).