Det norske Theater

Det norske Theater var eit teater i Bergen skipa i 1850 og nedlagd i 1863, då det gjekk konkurs.^[1][2] Ole Bull og medhjelparar som Frits Jensen og Magdalene Thoresen fekk i gang drifta av teateret, som sidan hadde både Henrik Ibsen og Bjørnstjerne Bjørnson som tilsette.

For andre tydingar av oppslagsordet, sjå Det Norske Teatret.

Det norske Theater
Komediehuset på Engen som husa Det norske Theater og Den Nationale Scene i dei første åra, til ein ny teaterbygning blei oppført.
Skipa	2. januar 1850
Leiar	Direktør Peter Blytt, instruktørar: Fritz Jensen, Herman Laading, Henrik Ibsen, Bjørnstjerne Bjørnson
Oppløyst	17. mai 1863

Det første ensembelet i Det norske Theater med mellom anna Johannes Brun, Louise Brun, Andreas Isachsen, Fredrikke Nielsen, Lucie Wolf og Jacob Prom.

Teateret blei innvigd med ei førestilling på stiftingsdagen den 2. januar 1850, ein dato som også i åra etter blei feira med premiereførestillingar. Det første stykket som blei spelt var Den Vægelsindede av Ludvig Holberg.^[3]

Frits Jensen fekk ansvaret for å instruera unge, uerfarne skodespelarar. Det norske Theater gav førestillingar kvar onsdag og søndag i vår- og haustsesongen. Teateret heldt til i Komediehuset på Engen, som var bygd i 1800.^[4] I 1876 blei Den Nationale Scene opna i den same bygningen.^[5]