Doncaster

Doncaster er ein by i South Yorkshire i England. Innbyggjarane kallar han gjerne berre Donny.

Doncaster
Doncaster frå Frenchgate Centre Doncaster frå Frenchgate Centre
Kallenamn «Donny»
Plassering
Styresmakter
Land	Storbritannia
Konstituerande land	England
Grevskap	South Yorkshire
Distrikt	Doncaster
Geografi
Innbyggjarar  - By (2007)	67 336
Koordinatar	53°31′N 1°8′W
Diverse annan informasjon
Postnummer	DN1-DN12
Telefon-retningsnummer	01302
Commons har multimedium som gjeld: Doncaster

Den første kjende busetnaden på staden var eit romersk fort bygd i 1. hundreåret ved ein vadestad ved elva Don. Fortet fekk namnet Danum, og den noverande staden er samansett av forvanskingar av Danum og castrum (latin, «fort»). I angelsaksisk tid var Doncaster truleg bustad for kongane av Northumbria.

Etter at Vilhelm Erobraren hadde teke makta i 1066 vart byen, som hadde forfalle kraftig, gjenoppbygd av normannarane. Dei bygde òg ei festning ved Conisbrough.

Omkring 1500-talet byrja byen å tene godt på hesteoppdrett, og dette førte vidare til at ein byrja å skipa til hesteveddeløp. Dei første veddeløpa i byen skal ha vore arrangert tidleg på 1600-talet, men det som gav Doncaster ry var løpa St. Leger Stakes, som først vart skipa i 1770-åra.

Etter den industrielle revolusjonen kom jarnbanen til Doncaster. Great Northern Railway sitt lokomotiv- og vognbyggeri vart lagt dit, og på denne verkstaden vart både Mallard og Flying Scotsman bygd. Byen ligg i dag ved den austlege hovudlinja mellom London og Skottland.

Under første og andre verdskrigen vart jernbaneindustrien omstilt til ammunisjonsproduksjon. Etter 1945 vart Doncaster ein av dei viktigaste kolgruvebyene i England, og gruvene vart langt den største arbeidsplassen i området. Mange av jobbane gjekk tapt ved nedtrappinga av gruveindustrien i 1980-åra, og det er i dag nesten inga utvinning av kol rundt Doncaster.

Sidan det som gjennom etterkrigstida har vore hovudnæring forsvann har byen freista å etablere seg som eit sentrum for handel og fritidsaktivitetar. Hesteveddeløpa er enno særs populære, og trekkjer mange vitjande.

Doncaster har ein av dei mest framgangsrike kvinnefotballklubbane i England, Doncaster Belles LFC, og dessutan herrefotballklubben Doncaster Rovers FC.

Kjelder

• Denne artikkelen bygger på «Doncaster» frå Wikipedia på bokmål, den 12. juli 2011.