Francesco Graziani

Francesco Graziani (fødd 16. desember 1952) er ein tidlegare italiensk fotballspelar og seinare -trenar frå Subiaco i Roma-provinsen i Italia. Han vart verdsmeister under VM i fotball 1982 i Spania, og vann seriegull med AC Torino i 1976.

Francesco Graziani

Francesco Graziani i Torino-drakt
Personleg informasjon
Fullt namn	Francesco Graziani
Fødd	16. desember 1952 (72 år)
Fødestad	Subiaco i Italia
Høgd	180 cm
Posisjon	Midtbanespelar
Seniorkarriere*
År	Lag	Kampar	(Mål)
1972-1973	Arezzo	48	(11)
1973-1981	Torino	221	(97)
1981-1983	Fiorentina	52	(14)
1983-1986	Roma	57	(12)
1986-1988	Udinese	33	(8)
1988	APIA Leichhardt	2	(0)
Landslag
1975-1983	Italia	64	(23)
Trenar for
1989-1990	Fiorentina
1990-1991	Reggina
1991-1992	Avellino
2001-2002	Catania
* Seniorklubbkampar og mål berre telt for nasjonal liga

Klubbspel

Graziani debuterte for Serie B-klubben Arezzo i 1970/71-sesongen. Sommaren 1973 vart han overført til Torino. I 1976 vart han italiensk meister med klubben. Året etter var han målkonge i den italienske serien med 21 mål på 30 kampar, klubben kom på sølvplass i serien. Etter 221 kampar og 97 mål forlet Graziani i 1981 Torino for å spele for Fiorentina.

Han spela to år for klubben frå Firenze. Åra 1983-86 spela han for Roma. Roma hadde i 1983 vunne Serie A, og Graziani fekk då høve til å vere med å spele klubben fram til finalen i Europacupen 1984. Finalen mot Liverpool FC gjekk på olympiastadion i Roma, og enda 1-1 etter ekstraomgangar. Den avgjerande straffetevlinga vann Liverpool med 4-2, Graziani var ein av Roma-spelarane som missa på straffe. Roma vart elles cupvinnar i Italia både i 1984 og -86. Han avslutta som aktiv fotballspelar i Italia med to sesongar, 1986-88, i Udinese. Sidan spela han ei tid for ein fotballklubb i Australia.

Landslagsspel

Graziani spela 64 landskampar for Italia mellom 1975 og 1983, skåra 23 mål på det italienske fotballandslaget. Han var med både VM i Argentina 1978 og under europameisterskapen i fotball 1980 i Italia. På heimebane i Napoli i juni 1980 skåra han Italia sitt mål i bronsefinalen mot Tsjekkoslovakia, ein kamp der det stod 1-1 etter ekstraomgangar, og der Italia tapte straffeskytinga med 7-8.

Graziani var med i fyrsteellevaren då Italia vart verdsmeistrar i Spania 1982, men vart skadd i finalen og forlet bana etter sju minuttars spel. Italia vann kampen i Madrid med 3-1 over Vest-Tyskland.

Merittar

• VM-gull 1982 for Italia
• Italiensk seriemeister 1986 med Torino
• Italiensk cupmeister 1984 og 1986 med AS Roma
• Sølvvinnar i Europacupen 1984 med AS Roma

Kjelder

• Denne artikkelen bygger på «Francesco Graziani» frå Wikipedia på tysk, den 28. juni 2012.