Hildesheim

Hildesheim er ein by i Tyskland i delstaten Niedersachsen med om lag 105 000 innbyggjarar. Byen ligg ved elva Innerste, som er ei sideelv til Leine.

Hildesheim
by
Våpenskjold
Land	Tyskland
Stat	Niedersachsen
Landkreis	Hildesheim
Høgd	78 m
Areal	92,29 km²
Folketal	102 325 (31. desember 2023)
Grunnlagd	815
Postnummer	31101–31141
Retningsnummer	05121
Bilnummer	HI
Hildesheim 52.15°N 9.95°E / 52.15; 9.95
Wikimedia Commons: Hildesheim

Den romanske domkyrkja St. Maria frå 800-talet vart øydelagd i 1945, men rekonstruert kort tid etter krigen. Denne og kyrkja Michaeliskirche vart plassert på UNESCO si verdsarvliste i 1985.

Historie

Byen vart eit sete for Bispedømet Hildesheim i 815. I fire hundre år styrte prestestanden Hildesheim, før det vart bygd eit rådhus og innbyggjarane fekk noko meir påverknad. I 1367 vart Hildesheim eit medlem av Hansaen.

Byen vart hardt råka av dei allierte sine bombetokt under den andre verdskrigen i 1945, særleg 22. mars. Sentrum, som hadde hatt preg av ein mellomalderby fram til då, vart fullstendig jamna med jorda. Etter krigen vart byen bygd opp att i ein ny stil med betongbygningar i staden for dei eldre bygningane. Seint i 1970-åra byrja ein derimot å rekonstruere det historiske sentrumet. Dei firkanta betongbygningane vart rive ned og erstatta med kopiar av dei opphavlege bygningane.

I 1970-åra vart òg universitetet Stiftung Universität Hildesheim oppretta.

Domkyrkja St. Andreas i Hildesheim. Ho har det høgaste spiret (114,5 m) i Niedersachsen.