Hjalmar Johnssen

Hjalmar Johnssen (25. juni 1852–28. november 1901) var ein norsk målar og illustratør.^[1]

Hjalmar Johnssen
Statsborgarskap	Noreg
Fødd	25. juni 1852 Stavanger kommune
Død	28. november 1901 (49 år) Haugesund kommune
Yrke	kunstmålar
Hjalmar Johnssen på Commons

Johnssen var son av hamnefogd Konrad Johnssen og Margrethe Petrea Blankenborg Prydtz Bang, og bror av forfattaren Peter Rosenkrantz Johnsen. Han var fødd i Stavanger og voks opp i Bergen. Etter å ha fullført latinskulen drog han til sjøs, og blei etterkvart styrmann. I 1875 gjekk han i land og slo seg ned i Christiania, der han var tilsett hjå ein skipsmeklar. Han hadde tileigna seg ein del kunstkunnskapar, og prøvde å livnæra seg som kunstnar frå 1879. Vinteren 1880 var han elev hjå Johan Jacob Bennetter i Stavanger. Han hadde planlagd å studera hjå marinemålaren Vilhelm Melbye i København, men denne døydde før han kunne gjera det. I staden fekk han ein kort studietur til Paris og nokre månader som elev hjå Frits Thaulow i Kragerø i 1882. Johnssen bidrog til å undermåla fleire av verka til Thaulow, som berømte gatepartiet frå Bjørnborgbakken med ungar på kjelke. Sjølv måla han landskapsmåleri og eit portrett av Frits Thaulow under opphaldet. I seinare år var han fleire somrar ved Fredriksvern (Stavern) og i Skudeneshavn på Karmøy. Hjalmar Johnssen måla ei rekkje motiv frå skip, hamner og skjergarden. Han verka også som illustratør, mellom anna i Folkebladet.^[1]

I 1890-åra var han formann i Bildende kunstneres fagforening.^[1]

Han var gift med Lydia Eugenie Olsen (f. 1848).^[1]

Galleri

• 
  Jekt 'Svanen' af Sogndal (1883)
• 
  Etter regn (1886)
• 
  Losbåt i høy sjø
• 
  "Viking"s mottagelse i Chicago 12. juni 1893 (1898)