Indisk dans

Indisk dans omfattar fleire ulike danseformer, som klassisk indisk dans, ei rekkje folkedansar og nyare koreograferte dansar. Mange lokale tradisjonar bygde på støtte frå rike fyrstar, og har gjerne ein forteljande funksjon der dei kan formidla ulike mytar, som soger frå Ramayana eller Mahabharata.^[1] I indisk film finn ein ofte store dansenummer som kan vera koreograferte med element frå desse formene. Gjennom den vide utbreiinga til indiske filmar, særleg Bollywood-filmar, er slik dans blitt kjend verda over.

Dansetruppen Rudrakshya utøver klassisk odissidans.

Historie

Guden Sjiva som Nataradja, 'dansekongen'. Relieff frå Badami.

Kulturelt sett har dans ein viktig plass i det indiske samfunnet. Dans kan vera eit religiøst uttrykk, og fleire gudar blir omtalte som dansarar. Allereie i Rigveda er Indra nemnd som ein dansar. I seinare hinduisme er Sjiva kalla Nataradja, 'kongen av dans'. Sanskritteksten Natyasjastra^[2] og religiøse tradisjonar innan hinduismen dannar grunnlaget for det ein reknar som dei klassiske dansane.^[3][4][5]

Det finst dokumentasjon på dans i India frå førhistorisk tid. Steinaldermåleri som ved verdsarvstaden Bhimbetka i Madhya Pradesh syner dansescenar.^[6] Skulpturar frå Induskulturen, med funnstader i noverande India og Pakistan, viser også dansandefigurar. Til dømes syner den kjende Dansande jente-skulpturen frå rundt 2500 f.Kr. ei jente ståande i noko som gjerne blir tolka som ein dansepositur.^[7][8][9]

Nokre ulike dansar

Folkedans frå Rajasthan.

• Sjå òg klassisk indisk dans
• Singhajit Singh
• Bhangra frå Pandjab
• Jhumair frå nordaustlege India
• Rouff frå Kashmir
• Hikat frå Himachal Pradesh
• Dalkhai frå Orissa
• Gendi av gondfolket i Madhya Pradesh.
• Britadans frå Bengal
• Kali natsj
• Bihu frå Assam

Galleri

• Døme på theyyam, ein rituell dans frå Kerala
• Skulejenter i Uttarakhand syng og dansar.