Kanadatrane

Kanadatrane (Antigone canadensis) er ein særs stor fugl i tranefamilien (Gruidae). Arten høyrer til slekta Antigone, som i alt omfattar fire artar. Seks underartar er godkjente.

Kanadatrane
Kanadatrane
Utbreiing og status
Status i verda: Livskraftig Utbreiinga av kanadatrane
Systematikk
Rike:	Dyr Animalia
Rekkje:	Ryggstrengdyr Chordata
Underrekkje:	Virveldyr Vertebrata
Klasse:	Fuglar Aves
Orden:	Tranefuglar Gruiformes
Familie:	Tranefamilien Gruidae
Slekt:	Fugleslekta Antigone Antigone
Art:	Kanadatrane A. canadensis
Vitskapleg namn
Antigone canadensis Linnaeus, 1758

Ifølgje IUCN si globale raudliste er arten livskraftig.^[1]

Taksonomi

Kanadatrane var tidlegare rekna til traneslekta, Grus, men «HBW and BirdLife International Illustrated Checklist of the Birds of the World» plasserer arten i Antigone, ifølgje del Hoyo et al. (2014).^[2] Nokon vel likevel framleis å plassera desse som basale artar i slekta Grus, men slekta blir då ifølgje Krajewski et al. (2010) parafyletisk.^[3]

Skildring

Kanadatraner varierer mykje i storleik. Nominatforma og underartane rowani og tabida viser ei gradvis morfologisk endring. Sistnemnde er betydeleg større og består av fem populasjonar som også viser morfologiske forskjellar, men desse er framleis lite studerte. Nominatforma blir kring 120 cm høg. Hannen veg cirka 3 750 g og hoa 3 350 g. Til samanlikning veg hannen av underarten A. c. tabida cirka 5 390 g og hoa 4 300 g. Vengespennet utgjer kring 160–210 cm.^[4]

Kanadatraner har unison grå fjørdrakt som lysnar litt oppover halsen mot hovudet. Også dette er fjørkledd, med unntak av den berre raude huda i panna. Dei ulike underartane varierer meir i storleik enn farge. Dei tre nordlegaste underartane er trekkfuglar, som ofte er meir brune enn grå under trekket. Dette kjem av at fjørdrakta blir farga av sølebad.^[4]

Inndeling og utbreiing

Inndelinga følgjer HBW Alive og Archibald et al. (2016).^[4] Norske namn følgjer Norsk namnekomité for fugl og Syvertsen et al. (2008).^[5]

Treliste

• Antigone
  • A. canadensis, kanadatrane
    • A. c. canadensis, nominatforma er utbreidd arktisk og subarktisk Nord-Amerika og Aust-Sibir. Ho overvintrar sørvest i USA og nord i Mexico
    • A. c. rowani, utbreidd i subarktisk Canada, frå Britisk Columbia og austover til det nordlege Ontario. Overvintrar langs kysten av Texas i Mexicogolfen, det sørvestre USA og det nordlege Mexico
    • A. c. tabida, fem populasjonar hekkar i Nord-Amerika, frå Vancouverøya til Dei store sjøane. Overvintrar i sør, frå California til Georgia, Florida og det nordlege Mexico
    • A. c. pulla, utbreidd i søraustlege Mississippi sør i USA
    • A. c. pratensis, utbreidd i Søraust-Georgia og Florida i USA
    • A. c. nesiotes, utbreidd på Cuba og Pinesøya
  • A. vipio, kvitnakketrane
  • A. antigone, sarustrane
  • A. rubicunda, brolgatrane

Habitat

Habitatet består av grunne våtmarksområde og fuktig grasland i breie elvedalar og langs innsjøar. Arten har òg tatt i bruk dyrka mark.^[4]

Åtferd

Arten hekkar på open våtmark. Dei tre nordlegaste underartane hekkar i mange ulike typar våtmark, medan dei sørlege òg hekkar på savanne, prærie og beiteland med meir.^[4]