Kanji

Kanji (japansk 漢字) er namnet på dei kinesisk-avleidde skriftteikna som blir brukte til å skriva japansk,^[1] i tillegg til dei to stavingsalfabeta hiragana og katakana. Namnet kanji tyder 'han[dynasti]-teikn',^[2] som på kinesisk heiter hanzi.^[3]

Jente øver seg på å skriva kanji. Ukiyo-e-trykk av Yoshu Chikanobu frå 1897.

Kanji har mange likskapar med hanzi, men begge skriftspråka har òg gått gjennom endringar. Det er kome til nye teikn i Japan og eldre teikn har fått nye tydingar. I tillegg har skrifta i Folkerepublikken Kina gått gjennom reformer som gjer at japanarar ikkje utan vidare vil kjenna att alle dei kinesiske teikna.