Linuxdistribusjon

Ein linuxdistribusjon er eit operativsystem laga av ei samling programvare, basert på Linux-kjernen, og inneheld som oftast eit pakkesystem for å installere, oppdatere, og fjerne programvare.

Installasjons-cd med linuxdistribusjonen Yggdrasil

Ein typisk Linux distribusjon består av Linux-kjerna, GNU verktya, dokumentasjon og hjelpefiler, samt eit vindaugesystem, vindaugehandsamar og eit skrivebordsmiljø. Det meste av programvara i ein distribusjon er fri og open kjeldekode, tilgjengeleg både som kompilært binærkode og som lesbar kjeldekode, som brukaren er fri til å endre på. Dei fleste distribusjonane av Linux inneheld også programvare der kjeldekoda ikkje er tilgjengeleg, til dømes proprietære drivarar direkte frå maskinvareprodusenten. Nokre distribusjonar vel å ikkje leggje desse ved, gjerne av ideologiske grunnar.

Det finst om lag 600 forskjellige tilgjengelege distribusjonar av Linux.^[1] Mange av desse rettar seg mot bruk på stasjonære og berbare datamaskinar eller tenarar, andre rettar seg meir mot mobiltelefonar og nettbrett, eller minimale miljø typisk til bruk i integrerte system.