Norsk Folkehjelp

Norsk Folkehjelp er ein norsk humanitær medlemsorganisasjon som vart skipa i 1939 som den humanitære og partipolitisk uavhengige solidaritetsorganisasjonen til den norske fagrørsla.^[1] Han har som oppgåve å syne internasjonal solidaritet i praksis ved å støtte utsette grupper som til dømes urfolk, fattige bønder, kvinner og ungdom, slik at dei sjølv vert i stand til å fremje interessene sine. Organisasjonen legg difor stor vekt på å finne dei rette samarbeidspartnarane i landa dei er engasjerte i, og gjere det mogleg for dei å drive arbeidet vidare sjølve.

Norsk Folkehjelp
Type	forening/lag/innretning
Org.nummer	871033552
Skipa	7. desember 1939
Hovudkontor	Oslo
Generalsekretær	Per Nergaard
Medlemmer	16 000
Undergrupper	Norsk Folkehjelp Sanitet Norsk Folkehjelp Solidaritetsungdom Norsk Folkehjelp Sanitetsungdom
Nettstad	https://folkehjelp.no

Organisasjonen er engasjert i meir enn 35 land^[1] og arbeider for rettferdig fordeling av makt og ressursar og vern om liv og helse ved å arbeide internasjonalt med langsiktig utviklingsarbeid, med rydding av eksplosiv og miner etter krig og konflikt, og med hjelpearbeid der det er akutt naud. Norsk Folkehjelp har arbeidd seg opp til å verte ein av dei fremste organisasjonane i verda på sivil, humanitær rydding av landminer, og har arbeidd aktivt både i Noreg og internasjonalt for å få til internasjonale forbod mot å lage og nytte landminer og klasevåpen.

Norsk folkehjelp er partipolitisk uavhengig, men ikkje politisk nøytral.^[2] Organisasjonen tek standpunkt i viktige samfunnsdebattar, og kan velje lokale samarbeidspartnarar som kan stå i opposisjon til, eller vere i konflikt med, makthavarane i landet sitt.

I Noreg driv Norsk Folkehjelp sanitets- og redningsteneste, og flyktning-, asyl- og integreringsarbeid.^[1]