PLUS

Brukskunstsenteret PLUS eller berre PLUS (etablert 1958 i Gamlebyen i Fredrikstad, nedlagt 1978) var eit senter for design og kunsthandverk. Det vart oppretta som eit norsk non-profit senter for design, men utvikla seg til eit meir vanleg verkstadsområde for kunsthandverkarar. Målet ved opprettinga var å foreine kunstnar og industri.^[1] Marknadsføring og sal av tinga dei laga var ved Norway Design. Logoen nytta på varene var eit plussteikn designa av Hermann Bongard som var kunstnarisk leiar 1960-64. For emballasjen fekk Roar Høyland den europeiske Eurostar-prisen 1961 og den norske ID-prisen. Ein av dei tidlege leiarane for foretaket var arkeologen Karl Vibe-Müller.^[2]

I kolonien var det:

• korgfletteri,
• glashytte leia av Richard Duborgh 1958-70, der Arne Jon Jutrem og Benny Motzfeldt (leiar frå 1970) arbeidde med glassblåsarane Henry Svendsrud og Jack Johansen. Hytta brann ned i 1979
• keramikkverkstad, først leia av Rolf Hansen, seinare av ekteparet Tone og Richard Duborgh
• tredreieri og smie for smijern
• sølvsmie (Sølvstua) med ekteparet Erling Christophersen og Anna Greta Eker, i tillegg til lærling Tone Vigeland (1958-61). Leiar for produksjonen var Odvar Pettersen.
• møbelverkstad
• klesstiltrykkeri (Vevstua)