Peter Pears

Peter Neville Luard Pears CBE (22. juni 1910–3. april 1986) var ein engelsk tenor. Han var musikalsk og personleg partnar til komponisten Benjamin Britten i nær førti år.

Peter Pears
Fødd	22. juni 1910
Fødestad	Farnham
Død	3. april 1986 (75 år)
Dødsstad	Aldeburgh
Fødenamn	Peter Neville Luard Pears
Opphav	Storbritannia
Instrument	vokal
Stemmetype	tenor
Verka som	songar, operasongar, komponist
Sambuar med	Benjamin Britten
Prisar	kommandør i den britiske imperieorden, Knight Bachelor

Liv

Pears blei utdanna ved Lancing College og studerte musikk ved Keble College i Oxford.^[1] I studietida var han organist ved Hertford College i Oxford, men avslutta studiane utan å avlegga eksamen.^[1] Han studerte seinare song i to semester ved Royal College of Music i London.^[1]

Han møtte Benjamin Britten då han var medlem av BBC Singers.^[2] Pears og Britten heldt sin fyrste konsert saman i 1937 på Balliol College i Oxford.^[3] Seinare var dei ei tid saman i USA, og då dei vendte tilbake til Storbritannia, framførte dei Britten sine Seven Sonnets of Michelangelo i Wigmore Hall i London. Dei spelte også verket inn for EMI som det fyrste fellesopptaket sitt.

Mange av verka til Britten har ei leiande tenorrolle skriven for Peter Pears. I dei finst Nocturne, Serenade for tenor, horn og strykarar, Canticles, operaene Peter Grimes og Albert Herring (tittelrollene), The Beggar's Opera (Macheath), Owen Wingrave (Sir Philip Wingrave), Billy Budd (Captain Vere), The Turn of the Screw (Quint), Death in Venice (Aschenbach) og Church Parables.

Pears var medforfattar av librettoen til A Midsummer Night's Dream, og gjorde ei av dei få komiske rollene sine i denne operaen.

Han debuterte på Metropolitan Opera i New York i oktober 1974 som Aschenbach i Death in Venice. Før dette hadde han sunge jamleg på Royal Opera i London og på mange andre operaascenar i Europa og USA.

Han var òg ein hylla tolkar av Schubert sine lieder, vanlegvis med akkompagnement av Britten, og han gjorde framifrå tolkingar av evangelistpartia i Bach sine pasjonar.

Pears blei utnemnd av dronninga til Commander of the British Empire (CBE) 1978.

Han er gravlagd på kyrkjegarden til Saint Peter and Saint Paul's Church i Aldeburgh o Suffolk, ved sida av grava til Britten.