Reidar Larsen

Reidar Larsen (fødd 12. mars 1955) er ein norsk blues-pianist, vokalist og komponist busett i Stavanger.

Reidar Larsen
Statsborgarskap	Noreg
Fødd	12. mars 1955 (70 år)
Yrke	songar, musikar, pianist, plateartist
Reidar Larsen på Commons

Karriere

Reidar Larsen flytte til Stavanger som femåring, og har vakse opp i byen. Han tok pianotimar frå sjuårsalderen, og starta band allereie på ungdomsskulen. Han var med på si fyrste plateutgjeving i 1974 med pop- og dansebandet Staccato, og han var med i rockegruppa Stavangerensemblet frå oppstarten i 1978 til 1980, og i musikkgruppa Smalhans frå 1980 - 1983. Sistnemnte gav ut to plater i tida Larsen spelte med dei.

Allereie i 1980 hadde Larsen starta Reidar Larsen Blues Kvartett, men han debuterte som soloartist med plateutgjevinga I'm a Bluesman i 1982. Oppfylgjaren Red, White and Blues kom i 1985, og You Don't Have to Be Black to Be Blue frå 1987 vart det fyrste soloalbumet hans som kom på VG-lista.

Seinare i karrieren har Larsen spelt inn album med backing-banda The Boogie Bastards (frå 1991) og The Storytellers (frå 1997). I 2006 spelte han inn duoalbum med den amerikanske gitaristen Roy Rogers. På plata Kom inn te oss frå 2009 hadde han gått over til å syngja på norsk, på stavangerdialekt.^[1] For denne plata vann han Spellemannprisen 2009 i kategorien blues. Larsen har også opptrådt på Notodden Blues Festival og vunne Notodden Bluesfestivals bluespris.

Diskografi

• I'm a Bluesman (Desperado, 1982)
• Red, White and Blues (Desperado, 1985)
• You Don't Have to Be Black to Be Blue (Desperado, 1987)
• Last Train Home (Desperado, 1990)
• Boogie Bastard (Sonet, 1992)
• Robbery (Sonet, 1993)
• Storyteller (Sonet, 1997)
• This One's on Me (Blue Jersey, 2001)
• Crossing (Blå finger / Bare Bra Musikk, 2006) saman med Roy Rogers
• Kom inn te oss (Blå finger / Universal, 2009)

Samle- og konsertalbum

• Blues i boks (Slagerfabrikken, 1990) samlealbum
• Statement (Sonet, 1994) liveinnspilling i The Cotton Club, New York
• Statement 2 (Sonet, 1995) liveinnspilling i The Cotton Club, New York
• A Completed Statement (Sonet, 1995) Statement og Statement 2
• Mr. Blues Is Coming to Town (Universal, 2003) samlealbum

Kjelder

• Store Norske Leksikon om Larsen, skrive av Jon Vidar Bergan.
• Biografi frå Reidar Larsen si offisielle nettside.
• Bokmålswikipedia om Reidar Larsen, henta inn 14. februar 2011.