Salinisering

Salinisering er ein prosess der saltinnhaldet i eit jordsmonn aukar, noko som gjer jorda mindre fruktbar. Dette kan vera ein naturleg prosess, men kan også skuldast menneskeleg påverknad, ofte som følge av jordbruk.

Sterk grad av salinisering i California.

Salinisering finn stad når det blir tilført meir salt til eit område enn det som forsvinn. Nesten alt vatn inneheld ei viss mengd oppløyst salt, også regnvatn.^[1] Høg fordamping eller dårleg drenering kan begge gje høgare saltinnhald i jorda. Vanlege menneskeskapte grunnar til salinisering er tilførsel av ekstra vatn, som ved kunstig vatning, eller erstatning av plantar som tek opp mykje vatn med plantar som er meir nøysame.

I nokre høve kan jorda bli så salt at berre halofyttar, eller saltplantar, kan veksa der, eller prosessen kan føra til erosjon og landdegradering.