Sephanoides

Sephanoides er ei biologisk slekt i kolibrifamilien med to artar. Dette er to systerartar som begge har nærvære på Juan Fernández-øyane, ei øygruppe i Stillehavet som tilhøyrer Chile. Den eine arten, gullkolibri, er endemisk for Robinson Crusoe-øya og klassifisert som kritisk truga.^[1] Den andre, eldkronekolibri, lever på begge dei to største øyane i gruppa, samt over sørlege delen av fastlands-Chile og Argentina.

Sephanoides
Gullkolibri, Sephanoides fernandensis, hofugl Foto: Arthur Grosset
Systematikk
Rike:	Dyr Animalia
Rekkje:	Ryggstrengdyr Chordata
Underrekkje:	Virveldyr Vertebrata
Klasse:	Fuglar Aves
Orden:	Seglarfuglar Apodiformes
Familie:	Kolibriar Trochilidae
Underfamilie:	Lesbiinae
Stamme:	Lesbiini
Slekt:	Sephanoides G. R. Gray, 1840

Skildring

Sephanoides er mellomstore til store kolibriar, en vaksen gullkolibrihann kan bli 12 centimeter og vege 11 gram.^[2] Begge artane syner kjønnsdimorfisme, hos gullkolibri er det ekstremt med hannen sin kanelraude farge. Hoene kan forvekslast på Róbinson Crusoe-øya, men gullkolibrihoa er litt større og har blå krone og blåskjær i overgumpen der eldkronekolibrihoa er grøn. Hannar er generelt større enn hoer.

Eldkronekolibrien har ein estimert populasjon på ca. 5000 individ fordelt på dei to Juan Fernández-øyane.^[3] Det siste estimatet på gullkolibri er på opp mot 3500 modne individ.^[1] I tillegg har eldkronekolibrien ein vidare utbreiing med ukjent storleik på fastlandet. Eldkronekolibrien er klassifisert som livskraftig av IUCN.^[4]

Evolusjon

Genetisk likskap mellom populasjonar av eldkronekolibri på fastlandet og på Juan Fernández-øyane kan indikere at øyane har hatt ein eller fleire nylege koloniseringshendingar frå fastlandet. Dei to artane kan ha blitt isolerte frå kvarandre for mindre enn ein millionar år sidan, slik at gullkolibri som art kan vere utvikla isolert på øya og ikkje først på fastlandet.^[5] Dette er i så fall eit døme på allopatrisk artsdanning.^[6]

Galleri

• 
  Eldkronekolibri

  Foto: Ennio Nasi
• 
  Eldkronekolibri, hannfugl

  Foto: Felipe Bernala
• 
  Eldkronekolibri, hannfugl
• 
  Gullkolibri, hannfugl
• 
  Gullkolibri, hoe
• 
  Gullkolibri, hannfugl

  Foto: Héctor Gutiérrez Guzmán

Artslista

Sephanoides-kolibriar i rekkjefølgje etter IOC World Bird List V11.2, 2021,^[7] med norske namn etter Norske navn på verdens fugler:^[8]

• Eldkronekolibri, Sephanoides sephaniodes, Green-backed Firecrown, (Lesson, R & Garnot, 1827), (LC)
• Gullkolibri, Sephanoides fernandensis, Juan Fernandez Firecrown, (King, PP, 1831), (CR)