Slaktarfuglar

Slaktarfuglar, Cracticidae, òg kjent som kråkevarslarar, er ein biologisk familie av sporvefuglar, Passeriformes. Dette er kråkeliknande fuglar med sterk kroppsbygging, utbreidd i Australia, Tasmania og Ny-Guinea. Næraste slektningar er svalestarar, Artamidae.

Svart og kvit hann av songslaktarfugl (Cracticus nigrogularis) på ein kafé i Brisbane.

Slaktarfuglfamilien
Tasmankurrawong, Strepera fuliginosa Foto: KeresH
Systematikk
Rike:	Dyr Animalia
Rekkje:	Ryggstrengdyr Chordata
Underrekkje:	Virveldyr Vertebrata
Klasse:	Fuglar Aves
Infraklasse:	Neognathae
Overorden:	Passerimorphae
Orden:	Sporvefuglar Passeriformes
Familie:	Slaktarfuglfamilien Cracticidae

Skildring

Fjørdrakta til desse fuglane er vanlegvis svart og kvit eller gråfarga. Nebbet er kraftig, ofte med ein liten nedbøygd krok i enden. Hos nokre artar finn ein markert kjønnsdimorfisme. Slaktarfuglar varierer i lengd frå 25 til 53 centimeter.

Slaktarfuglar er altetande og lever mest av insekt, små landlevande virveldyr, frukt og frø. Cracticus-artar, tar òg små pattedyr og fuglar som dei deler opp før dei et. Slaktarfuglar byggjer reir av kvister, tørt gras og små røter i forgreiningar på tre. Dei legg to til fem blågrøne, grågrøne eller brunflekkete egg som blir ruga i omtrent tjue dagar. Ungfuglane er flygedyktige etter fire veker i reiret. Den australske arten svartslaktarfugl, Cracticus quoyi, hekkar frå september til februar, dei andre australske artane hekkar frå august til desember.

Etter ein DNA-studie i 1985, la Sibley og Ahlquist framlegg om ein ny klade Cracticini^[1] som samla Cracticidae og svalestarar i Artamidae.^[2] Dette er ikkje reflektert korkje i Clementslista eller i IOC World Bird List. Peltops-artane på Ny-Guinea var tidlegare plassert saman med monarkflugesnapparar.

Artslista

Slaktarfuglar i rekkjefølgje etter Clementslista versjon 6.8 frå august 2013^[3] med norske namn etter Norske navn på verdens fugler.^[4]

Slekt Peltops

• Fjellpeltops, Peltops montanus, Mountain Peltops, LC, Stresemann, 1921
• Låglandspeltops, Peltops blainvillii, Lowland Peltops, LC, Garnot, 1827

Slekt Cracticus

• Svartryggslaktarfugl, Cracticus mentalis, Black-backed Butcherbird, LC, Salvadori & D'Albertis, 1876
• Gråryggslaktarfugl, Cracticus torquatus, Gray Butcherbird, LC, Latham, 1801
• Sølvryggslaktarfugl, Cracticus argenteus, Silver-backed Butcherbird, Gould, 1841
• Papuaslaktarfugl, Cracticus cassicus, Hooded Butcherbird, LC, Boddaert, 1783
• Tagulaslaktarfugl, Cracticus louisiadensis, Tagula Butcherbird, DD, Tristram, 1889
• Songslaktarfugl, Cracticus nigrogularis, Pied Butcherbird, LC, Gould, 1837
• Svartslaktarfugl, Cracticus quoyi, Black Butcherbird, LC, Lesson, 1827

Slekt Gymnorhina

• Plystreskjor, Gymnorhina tibicen, Australasian Magpie, LC, Latham, 1801

Slekt Strepera

• Austkurrawong, Strepera graculina, Pied Currawong, LC, White, 1790
• Tasmankurrawong, Strepera fuliginosa, Black Currawong, LC, Gould, 1837
• Sotkurrawong, Strepera versicolor, Gray Currawong, LC, Latham, 1801