Stein Herdisson

Stein Herdisson (norrønt: Steinn Herdísarson) var ein islandsk skald som levde omkring midten av 1000-talet.

Opphavet til skaldskapen: i ørne-ham stal Odin skaldskapsmjøden frå jotnen Suttung, og gav han til æsene og dei folk som kan dikte.
(Illustrasjonen er frå ein biletstein på Gotland)

Liv og skaldskap

Stein Herdisson var oldebarn av skalden Einar Skålaglam^{[Note 1]} og dermed ein slektning av skalden Stuv Blinde og hovdingen Ulf Ospaksson (Stallare)^{[Note 2]}. Truleg kom han til Noreg då Magnus den gode var konge. Seinare var han hos kong Harald Hardråde og han var med i slaget ved Niså (Nissan) i 1062, der han var om bord på skipet til frenden sin, Ulf Stallare. Etter at kong Harald fall i England i 1066, var Stein i Noreg på den tida då Olav Kyrre var konge.

Desse dikta av Stein Herdisson er kjende:

Nisåviser^[1] – - om førebuingane til slaget ved Niså i 1062, og om sjølve slaget med relativt detaljerte opplysninger.

Ulfsflokk^[2] – rest av eit dikt, truleg ei arvedråpa, om Ulf Ospaksson.

Olavsdråpa^[3] – om kong Olav Kyrre, om hærferda til England (1066), og om styret til kong Olav i tida etter.

Fragment^[4] - eitt vers.

I Skaldatal^[5] er Stein Herdisson ført opp som skald hos kong Harald Hardråde, hos kong Magnus den gode og hos Ulf Ospaksson (Stallare). Snorre har nytta dikt av han i Skaldskaparmål^[6] i Den yngre Edda.

Det har vore drøfta om skaldekvadet «Rekstefja», ei dråpa til ære for Olav Tryggvason, kan ha blitt dikta av Stein Herdisson, men ein reknar med som mest truleg at dette kvadet er dikta av skalden Hallar-Stein^[7].