Thorolf Holmboe

Thorolf Holmboe (10. mai 1866–8. mars 1935) var ein norsk kunstmålar, illustratør og designar.

Thorolf Holmboe
Statsborgarskap	Noreg
Fødd	10. mai 1866 Vefsn kommune
Død	8. mars 1935 (68 år) Oslo
Yrke	kunstmålar, illustratør, exlibrisist
Thorolf Holmboe på Commons

Thorolf Holmboe: Teiking av Alstahaug kyrkje

Holmboe var fødd i Vefsn , men voks opp i Alstahaug og, frå han var ti år, i Tromsø, der faren Othar Ervigius var kunsthandlar, tollkasserar og landmålar. Faren var òg ein av grunnleggjarane av Tromsø Kunstforening og ein habil akvarellmålar. Broren Othar Holmboe vart òg kunstmålar.

Thorolf Holmboe tok artium og Krigsskolens nedste avdeling i Kristiania før han i 1886 reiste til Berlin og vart den siste norske eleven av Hans Gude. Han debuterte på Høstutstillingen i 1887 med fleire motiv frå Helgeland. Mot slutten av 1880-alet var Holmboe ei tid i Paris. Her fekk han sjå japanske arbeid, som då var på moten, og han fekk interesse for kunsthandverk og kunstindustri.

Mellom dei illustrasjonane han teikna, er furua som prydar framsida til Nitedals fyrstikkeske, hanen på Sætre kjeks og vikingskip-emblemet til Norsk Hydro.

Holmboe framstilte ei stor mengd bruksgrafikk, herunder òg overrekkingskort og postkort, oftast i jugendstil. Han fekk m.a. trykt ein serie postkort med Nordlandsmotiv, sidan ein serie med silhuett-motiv. Spesielt nordlandsmotiva vart trykte i mange opplag og nådde slik ut til dei breie lag av folket.

Holmboe illustrerte bøker av Vilhelm Krag, Johan Bojer , Jonas Lie og Petter Dass (Nordlands Trompet 1892).

Holmboe fekk Petter Dass-medaljen i 1912.

Bakgrunnsstoff

Kjelder:

• Kristin Halaas: «Thorolf Holmboe – det moderne bildet av Nordland» i Årbok for Helgeland 2006 ISBN 82-90148-66-6