Tom Vraalsen

Tom Eric Vraalsen (26. januar 1936–13. september 2021) var ein norsk diplomat og politikar for Senterpartiet.^[1] Han var bistandsminister i Syse-regjeringa 1989–1990.^[2][3]

Tom Vraalsen
Fødd	26. januar 1936 Oslo
Død	13. september 2021 (85 år)
Statsborgar av	Noreg
Parti	Senterpartiet
Yrke	politikar, diplomat
Utdanna ved	Handelshøjskolen i Aarhus Utanriksdepartementets aspirantkurs
Alle verv	Norsk utviklingsminister (1989–1990) Norges ambassadør til Storbritannia (1994–1996) Norges ambassadør til Finland (2001–2003) Norges ambassadør til USA (1996–2001)

Bakgrunn

Vraalsen voks opp på Frogner som son av Åre Vraalsen, direktør i Sørensen & Lies Kulkompani, og kona Franciska Andresen.^[2][4]

Etter Oslo handelsgymnasium utdanna han seg til siviløkonom ved Handelshøjskolen i Århus og gjekk UDs aspirantkurs.

Karriere

Vraalsen tenestegjorde i Utanriksdepartementet og ved ambassadane i Beijing, Kairo, Manila og Jakarta 1961–1975. Han var ministerråd ved den norske SN-delegasjonen i New York 1975–1979, spesialrådgjevar i Utenriksdepartementets politiske avdeling 1981–1982 og fast representant for Noreg ved SN i New York 1982–1989. Han hadde permisjon frå Utanriksdepartementet som direktør for samfunnskontakt i Saga Petroleum 1991–1992.^[5] Deretter var han SN-utsending til Sør-Afrika i 1992 og Noregs ambassadør i London 1994–1996, Washington, D.C. 1996–2001 og Helsingfors 2001–2003.^[6][7] Han hadde òg oppdrag som SNs spesialutsending for Sudan 1998–2004.^[8]

Vraalsen var formann i Oslo Senterparti 1979–1980 og medlem av Senterpartiets programkomite i 1979. Han var bistandsminister i Jan P. Syses regjering 1989–1990.

Tom Vraalsen vart utnemnd til kommandør av St. Olavs Orden i 1987 og tildelt storkrossen av Royal Victorian Order i 1994.^[9] Han var æresdoktor ved amerikanske Augustana College og Luther College.

Familie

Han var gift med Viebecke Vraalsen, tidlegare rådgjevar i Utanriksdepartementet.^[10]