Turné

Ein turné eller turne er ei rundreise der einkvan opptrer fleire ulike stader, og kan utførast av ulike utøvar, som kunstnarar, band, teater, orkester, foredragshaldarar og sportsfolk.^[1] Ein turné kan òg vera ein politisk valturné der einkvan som prøver å bli vald, eller hjelpa andre å bli valde, reiser rundt for å verva stemmer ved ulike valmøte.

Frå U2 sin 360° Tour.

Konsertturné

Ei musikkgruppe, som eit band eller orkester, kan ha ein turné der ho reiser rundt og speler konsertar mange ulike stader. Slike turnear kan dekka større eller mindre områda, og vera kortvarige eller gå føre seg over lengre tid. Ofte får turnear namn for å skilja ulike turnear av same artist frå kvarandre, og for å knytta ein spesifikk turné med eit bestemt album eller eit produkt. Særleg innan populærmusikken kan slike turar bli store verksemder som driv på i fleire månader eller til og med år, kan bli sett av tusen eller millionar av menneske, og kan bringa inn millionar av dollar (eller tilsvarande) i billettinntekter.