Yoshi

Yoshi er ein oppdikta dinosaur som er kjend frå fleire Nintendo-spel. Han debuterte som bifigur i spelet Super Mario World på Super Nintendo Entertainment System i 1991,^[1] med ei beskjeden rolle som Mario sitt ridedyr, men har seinare fått sine eigne spelseriar, som Yoshi's Story på Nintendo 64. Yoshi har sidan vore med i spel som Mario Kart, Mario Tennis og Mario Party.

Yoshi
Opptrer i	Super Smash Bros., Super Mario World, Yoshi's Island, Yoshi's Safari, Yoshi's Story, Yoshi's Universal Gravitation, Yoshi Touch & Go, Yoshi's Island DS, Super Mario 64 DS, Yoshi's New Island, Yoshi's Woolly World, Yoshi’s Crafted World, Super Mario Party, Super Mario Kart, Super Mario Odyssey, Super Smash Bros. Melee, Super Smash Bros., Mario Kart 64, Mario Kart Super Circuit, Mario, Yoshi, Mario Party, Mario Party 2, Mario Party DS
Identifisert med	Yoshi

Kjenneteikn

Det særeigne med Yoshi er salen, tunga, evna til å lage egg og hoppeevna. Yoshi var fyrst eit ridedyr for Mario og Luigi, men han har òg på seg salen i spel kor han spelar andre roller. Det er lett å tru at salen er eit skjelpaddeskal og difor ta Yoshi for å vere ein skjelpadde i slekt med Koopa Troopa-ar og liknande Nintendo-figurar, men dette er ikkje meir enn ei vanleg mistolking.

Den lange, klissete tunga til Yoshi har ei nykelrolle i fleire spel. Tunga si nyttar Yoshi til å få tak i frukt, fiendar, myntar osv. på avstand. Kva han gjer med det han får tak i varierer frå spel til spel, men i hovudsak kan svelgde fiendar nyttast til å lage egg, som Yoshi seinare kan kaste. Yoshi kan sjeldan ha med seg meir enn seks egg med seg på ein gong.

I dei fleste spel kor Yoshi spring om kring og kan hoppe, kan han halde seg flygande ei lita stund ved å spinne med beina. I nokre spel kan Yoshi gjere dette igjen og igjen, men søkke litt lågare for kvar gong, i andre spel er det avgrensa til eitt slikt sprang mellom kvar gong han røyrer bakken.