Yusuf Saad Kamel

Yusuf Saad Kamel, opphavleg Gregory Konchellah, (fødd 29. mars 1983) er ein kenyansk tidlegare friidrettsutøvar som representerte Bahrain. Han vart i 2009 verdsmeister på 1500 meter.

Yusuf Saad Kamel
Statsborgarskap	Kenya, Bahrain
Fødd	29. mars 1983 (42 år) Narok
Idrett	friidrett
Tok del i	Sommar-OL 2008, Asialeikene 2006, Asialekene 2010

Konchellah vart statsborgar av Bahrain i november 2003. Han deltok på 800 meter i Sommar-OL 2004, men rauk ut i forsøket. Berre veker etterpå triumferte han på distansen med 1.45,91 ved IAAF-finalen i Monaco. I 2005 nådde han semifinalen på 800 meter ved Friidretts-VM i Helsinki. Under dei olympiske leikane 2008 i Beijing vart han nummer fem på 800 meter.

Ved verdsmeisterskapen i Berlin i 2009 overraska han med å vinne gullmedaljen på 1500 meter. Etter eit løp i heller roleg tempo, kom hans spurtstyrke til sin rett og han sigra på tida 3.35,93. Fire dagar seinare tok han bronsemedaljen på 800 meter med 1.45,35, slått av Mbulaeni Mulaudzi og Alfred Yego.

Den 29. juli 2008 gjorde Kamel sitt livs beste løp då han i Monaco vart andremann på tida 1.42,79. Eitt år seinare på same bana sprang han livsbeste 3.31,5 på 1500 meter.

Kjelder

• World Athletics
• Denne artikkelen bygger på «Yusuf Saad Kamel» frå Wikipedia på engelsk, den 17. september 2023.