Adolphe Guillaumat

Adolphe Guillaumat (4 de genier de 1863, Bourgneuf - 18 de mai de 1940, Nantas) es un generau francés de la Prumiera Guerra Mondiala e de l'entre doas guerras.

Adolphe Guillaumat en 1921.

Fiu d'un oficier d'infantariá, s'engatjèt dins l'armaa en 1882 e participèt a plusors conflictes coloniaus en Africa e en Asia. Nomat generau en 1913, obtenguèt plusors succès entre 1914 e 1917 e receupuguèt de comandaments mai e mai importants (33^a e 4^a division, I^èr còrs d'armaa e II^a armaa). En decembre de 1917, foguèt mandat dins los Balcans per prendre la direccion de las armaas aliaas en Orient. Reorganizèt lo frònt de Salonica e comencèt la preparacion de l'ofensiva que permetèt al generau Franchet d'Espèrey de rompre las defensas dels Emperis Centraus dins la region. Pasmens, en junh de 1918, deuguèt s'entornar en França per preparar la defensa de París menaçaa per las atacas alemandas. Puei, en octòbre, foguèt nomat chef de la V^a armaa e participèt a las ofensivas aliaas de la fin de la guerra.

Après la guerra, venguèt inspector generau de las armaas en 1919 e intrèt al Conseu Superior de la Guerra en 1920. De 1924 a 1930, comandèt las fòrças d'ocupacion francesa en Alemanha. Foguèt brevament ministre de la Guerra en 1926 dins un govern dirigit per Aristide Briand. Contunhèt de participar als trabalhs dau Conseu Superior de la Guerra dinque a sa retiraa en 1933.

Ligams internes

• Prumiera Guerra Mondiala.

Bibliografia

• (fr) Paul Guillaumat, Correspondance de guerre du général Guillaumat (1914-1919), París, L’Harmattan, 2006.
• (fr) Léon Noël, Témoignage d'un chef, le général Guillaumat, París, Alsatia, 1950.