Carola Rackete

Carola Rackete, nascuda lo 8 de mai de 1988 a Preetz (Schleswig-Holstein, Alemanha), es una capitani de naviri e una activista alemanda. Es coneguda per aver forçat lo blocatge italian en junh de 2019, a las comandas del naviri umanitari Sea-Watch 3, en seguida de qué foguèt arrestada e perseguida en justícia, especialament per «ajuda a l'immigracion clandestina», abans que la justícia italiana invalidèsse son arrestacion.

Biografia

Estudis e expedicions scientificas

Carola Rackete nais lo 8 de mai de 1988 a Preetz^[1][2], a proximitat de Kiel, dins lo nòrd d'Alemanha^[3][4], e grandís a Hambühren en Bassa Saxònia^[5]. Son paire es engenhaire electrician e sa maire comptabla^[1]. Es victima de secutament escolar pendent son adolescéncia^[1].

Après un bachelierat en sciéncias nauticas a l'universitat de Jade a Elsfleth, en Bassa Saxònia^[1], naviga pendent dos ans per d'expedicions scientificas en Artic e en Antartic dins l'encastre d'accions de l'institut Alfred Wegener per la recèrca polara e marina^[4][6][5]. Trabalha brèvament per una entrepresa de crosièras de luxe puèi acompanha un naviri oceanografic de Greenpeace e fa finalament un servici volontari europèu al sen del pargue natural dels volcans del Kamtchatka, abans de repréner sos estudis en 2015 e d'obténer un master en manejament environamental a l’universitat Edge Hill (Anglatèrra, Reialme Unit)^[5][7]. Carola Rackete trabalha qualques meses pel British Antarctic Survey, que mena de recèrcas scientificas en Antartic, abans de s'engatjar dins l'umanitari^[5].

Engatjament umanitari

Participa pel primièr còp en junh de 2016 a una mission de secors en mar de personas migrantas en Mediterranèa amb l'ONG umanitària alemanda Sea-Watch^[5][6].

En 2018, Carola Rackete pren tanben part a de recèrcas de naufragièrs dempuèi un avion, lo Colibri, per l'ONG francesa Pilòts volontaris^[5][8][9].

Distincions

La cònsol de París Anne Hidalgo desira decernir la medalha Grand Vermelh, la mai nauta distincion de la vila, a las doas capitanis del batèl Sea-Watch 3, Carola Rackete e Pia Klemp, per tornar afirmar son «sosten a las femnas e los òmes qu'òbran al salvament dels migrants al quotidian»^[10][11]. Totas las doas refusan aquesta decoracion, denonciant l'ipocrisia de la vila de París^[12].