Florant Mercadier

Florant Mercadier, nascut lo 16 de mai 1981 a La Sala dins Avairon, es un contaire, musician, cantaire, comedian, cronicaire, animator, escrivan e professor occitan. Es un actor de la scèna culturala occitana, construtz dempuèi son enfància d’òbras a la crosada de la tradicion orala, de la musica e de l’engatgament lingüistic. Es tanben connegut jol pseudonime Sarg, dins lo mitan gotic ont fa fòrça representacions.

Perfièchament bilingüe, Mercadier practica un occitan ric e plural. Son occitan natural es lo de Roergue, qu’utiliza dins sas creacions personalas o dins la familha, mas parla tanben amb fòrça aise l’occitan lengadocian normatiu, qu’emplega dins sas intervencions publicas e dins l’ensenhament. Mercés a sa maire, pòt tanben passar al gascon bearnés, e adapta alara sa lenga a sos interlocutors coma a sos contèxtes professionals.

Actualament tolosan, Mercadier se ganha la vida per mitat mercés a sa vida artistica e per l’autra mitat coma professor d’occitan al licèu Sant Sarnin. A tanben dubèrt lo primièr ensenhament d’especialitat (EDS) Occitan. Mercadier es engatjat dins la causa occitana mas es tanben un grand participant a la vida associativa.  

Biografia

Florant Mercadier nasquèt lo 16 de mai de 1981 a La Sala, dins Avairon, dins una familha d’ensenhaires engatjats dins lo militantisme occitan. Foguèt fòrça lèu immergit dins la cultura orala occitana del conte, que ne descobrís l’art de contar dins lo quadre de las velhadas ruralas de son enfància, de seradas festivas organizadas en fin de trabalhs agricòlas, ont s’improvisa sovent sus de taulas botadas per formar una scèna : cants, danças, devinalhas e racontes. Tre l’atge de tres o quatre ans, i prend part, desvolopant un aise natural per l’oralitat e son futur mestièr de contaire.

Es alara qu’un jorn, una jornalista de Ràdio Albigés esvelha en el l’enveja de contunhar çò que fasiá quora la jornalista qualifiquèt Mercadier de «one man velhada show», formula que reivindica encara uèi coma la melhora definicion de son mestièr e qu’inscriu de bon grat en omenatge a la jornalista. Se soven d’un episòdi marcant a l’atge de uèit ans, quora un apèl telefonic a son paire evòca pel primièr còp l’idèa d’èsser remunerat per contar. Aquel sovenir prefigura una vocacion confirmada qualques annadas pus tard, quora una contaira de la bibliotèca municipala èra absenta al moment d’un rodatge per France 3, e es Mercadier que contèt lo conte entièrament en occitan fàcia a las camèras per remplaçar la contaira. Una prestacion que serà la vertadièra debuta de sa carrièra.

Per perfeccionar sa pratica de la scèna, intègra per la seguida lo conservatòri de teatre de Tolosa. S’i forma per noirir son jòc e son interpretacion teatrala, en ligam dirècte amb son art de contaire.

Son apròchi de la musica e del raconte demòra prigondament ligat a la tradicion occitana, quitament se garda una certa distància critica dels quadres institucionals de l’ensenhament, que jutja de còps coma constrenhent a la creativitat.

Entamena tanben una carrièra dins l’ensenhament segondari. Aprèp una tentativa initiala per venir jornalista professional, efectua a l’atge de 19 ans un remplaçament dins un establiment escolar, experiéncia decisiva que l’incita a s’orientar cap a l’ensenhament. Obten lo CAPES en 2002 e ven professor d’occitan.

En mai de sas activitats professionalas, Mercadier s’investís dins una vida associativa màger, especialament dins l’associacion de l’UNADFI (Union nacionala de las assocacions de defensa de las familhas e de l’individú), ont consacra una granda partida de son temps liure. Foguèt egalament benevòl dotze ans al festenal de l'Estivada de Rodés, un eveniment màger de la cultura contemporanèa, que considèra coma un periòde important de sa vida.

Vida professionala

La vida professionala de Mercadier es marcada per son implicacion coma professor mas subretot per sa vida artistica coma contaire, musician, cronicaire e comedian a l’encòp.

Comencèt amb d’espectacles formals dempuèi 1999 ont es quasiment a cada còp el meteis autor, meteire en scèna e interprèt de sas òbras. Es acompanhat dempuèi 2007 per l’agéncia Sirventés. Prepausa tanben de visitas istoricas coma al castèl de Montsegur ont conta l’istòria sens cap de ressorsa a l’imaginacion, ne fasent una vulgarizacion istorica.

Pel costat musical, comença sa carrièra amb Guillaume Lopez dins lo grop Los d’Enlòc. Es tanben convidat sus l’album Duel de tchatche dels Fabulous Trobadors en 2003, e contribuís al cantadís dins Danse avec ta grand-mère del grop Les Bombes 2 bal en 2004. Collabòra regularament amb lo duo Brotto-Lopez per l’escritura dels tèxtes e de las musicas.

Son implicacion musicala se manifèsta tanben dins lo metal occitan : es paraulièr del grop de fòlc metal Antaoma, per los quals escriguèt l’essencial dels tèxtes. Faguèt tanben partida del grop Stille.Volk de 2009 a 2019, participant a d’albums coma Pèira Nègra e Milharis. Amb l’un dels ancians membres de Stille Volk, Samuel Meric, fonda lo grop Gofannon. Foguèt tanben membre de mantuns grops non exclusivament occitans coma Lysart de 2004 a 2009, Black Hills de 2009 a 2012 e Eydolon, son projècte personal en occitan, actiu dempuèi 2005, ont faguèt Mai de mila ans en 2007, L’insulta en 2009, Non-lei en 2012 e Lo libre de l’escur en 2018.

Compausa egalament de musicas per de companhiás de mariòtas, coma Chat perché, e s’illustra dins la cronica e l’animacion, domenis ont bota sa votz e sa cultura al servici de la vulgarizacion e del partatge.

Publicacion

En 2024, Florant Mercadier publica Quatre vidas, una mòrt, un recuèlh de novèlas bilingüe en occitan lengadocian e en francés en autotraduccion, editat per Edita-me. L’òbra nais pendent lo periòde del confinament sus la demanda de son editritz, a partir d’anecdòtas e d’istòrias vertadièras reculhidas quora foguèt en viradas. Mercadier cèrca alara a fixar per l’escrich aquestes racontes orals del quotidian, per que se pèrdan pas o que vengan pas, segon sos pròpris mots, de simples «i a un còp èra». Pensat a l’origina coma un recuèlh de contes, lo projècte evoluís cap a un format de novèlas, çò que considèra retrospectivament coma un escart per rapòrt a son intencion primièra. Assumís una frustracion cap al resultat, e mai lo libre siá plan aculhit pel public e plan vendut.

Participa egalament al projècte collectiu L’Òbra vida, òbra que fa un omenatge a Robèrt Martí, figura marcanta de la cultura occitana. Dins lo recuèlh a mantunas voses, Mercadier pren un apròchi mai literari e analitic que non pas personal o emocional, balhant un testimoniatge singular demest las contribucions.

Òbras principalas e collaboracions

Espectacles de contes :

- Contes de l’ors (1999)

- Tèrras del ponent (2001) – avec Guillaume Lopez

- Contes enluernats (2005)

- Contes del país d’enlòc (2006)

- Contes del placard (2007)

- Contes entre doas aigas (2010)

- Contes òrres e mai atrocitats (2011)

- L’Occitania pels nuls (2016)

- De çò mèu a çò mèu (2021)

Publicacions :

- Quatre vidas, una mòrt (2024) – recueil de nouvelles, Édita-me

- Contribution à L’Òbra vida en omatge a Robèrt Martí

Musica :

Amb Eydolon :

- Mai de mil ans (2007) – album

- L’Insulta (2009) – EP

- Non-lei (2012) – EP

- Lo libre de l’escur (2018) – album

Amb Stille Volk :

- Peira nègra (2014) – album

- Milharis (2019) – album

Amb Gofannon :

- Prosodie (2016) – album

- Lo vilatge (2017) – single

- Craft (2019) – album

Autras participacions e collaboracions musicalas :

- Los d'Enlòc – amb Guillaume Lopez (debuta de carrièra)

- Duel de tchatche – invitat dels Fabulous Trobadors (2003)

- Danse avec ta grand-mère – invitat pel cantadís (Les Bombes 2 Bal, 2004)

- Autor de las paraulas per lo Duo Brotto-Lopez

- Autor principal dels textes per lo grop de fòlc metal Antaoma (Malamòrt)

- Membre de Lysart de 2004 a 2009

- Membre de Black Hills de 2009 a 2012

Autras creacions :

Composicions musicalas per de companhiás de mariòtas, notadament Chat perché.