Fred Rister

Fred Rister, de son nom vertadièr Frédéric Riesterer, foguèt un productor, compositor de musica electronica e adobaire francés, tanben animator ràdio e discjòquei,^[1] nascut lo 19 de junh de 1961 a Malo-les-Bains (Nòrd de França) e mòrt d'un càncer lo 20 d'agost de 2019 a Tourcoing.^[2]

Al debut de las annadas 1990, comença d'aver de succès per sas composicions musicalas eurodance, composicions comunas ambe Jean-Patrick Allouche e l'adobaire Bruno Sanchioni (sòci de B.B.E. e de Age of Love), ambe de tròçes en anglés interpretats per la cantaira Abyale, I Wanna be Your Lover Too en 1991, e sustot I don't talk about L.O.V.E. en 1992,^[3] que foguèron de tubes vertadièrs en França.

De caps 1997-1998, jos l'escais de Mory Klein, participa al projècte tècno Ixxel qu'obten dos tubes en França, Alleeez (al mes de junh de 1997) e Drop that beat (novembre de 1998).

Es tanben reconegut internacionalament per aver coproduch e compausat nombroses tròces venguts capitadas a l'escala mondiala de David Guetta dempuèi las annadas 2000, coma per exemple en 2007 Love Is Gone ^[4] e Baby When the Light,^[5] o encara I Gotta Feeling en 2009, títol compausat especialament pels Black Eyed Peas.^[6]

A tanben produch en 2005 lo mitic album Darkside per sa femna Isabel Algarvio-Riesterer dicha Anaklein.

Del temps ont èra animator ràdio, s'es ligat d'amistat ambe lo discjòquei Joachim Garraud.