Golf

Un golf es una vasta porcion de mar qu'avança vèrs l'interior de las tèrras e que sa dobertura es pro larga en general. De mots parcialament sinonims son lo gorg, la baia, la rada e la conca (var. concha, cònca, còncha).

Pels articles omonims, vejatz golf & gòlf (omonimia).

Per exemple, los dos golfs principals que banhan Occitània son lo Golf de Gasconha, dins l'Ocean Atlantic, e lo Golf del Leon, dins la Mar Mediterranèa.

Lo mot golf: pronóncia, ortografia e etimologia

Lo mot golf a de pronóncias variadas e una ortografia unica. Aital:

• golf se pronóncia [ˈguf] en lengadocian e en gascon
• golf se pronóncia [ˈgu] en provençal, en auvernhat e en lemosin
• golf se pronóncia [ˈgulf] en vivaroalpenc e en niçard
  • En niçard (e benlèu en provençal oriental), lo mot golf pòt oscillar entre [ˈgulf] e [ˈgulfe], de meteissa manièra que lo mot niçard pòt oscillar entre [niˈsaʁt] e [niˈsaʁte], etc.

De variantas coma gof, gòu(f), gòlf e gòlfe son pas consideradas coma corrèctas segon lo diccionari normatiu occitan de Loís Alibèrt^[1].

Lo mot golf ven del latin vulgar colphus «golf, baia granda», e aqueste darrièr ven del grèc κὀλπος = kólpos «sen o gonèla d’una persona, golf, baia granda».