Joan Fèlix

Joan Fèlix (en francés: Jean Félix; Agde, 3 de decembre de 1885 - Agde, 31 d'octobre de 1968) èra un politician occitan, qu'a mai d'èsser cònsol de la vila lengadociana d'Agde de 1919 a 1944, foguèt deputat d'Erau de 1918 a 1928 e mai de 1932 a 1936.

Retrach de Joan Fèlix en 1929

Biografia

Sortit d'una familha modèsta, Joan Fèlix estudièt al collègi d'Agde ont obtenguèt son bachelierat. Abandonèt los estudes per s'avodar a la viticultura e militar a l'encòp dins totes los gropaments politics e economics d'avantgarda. Aital venguèt secretari de la federacion socialista d'Erau de 1912 a 1930 e mai secretari de l'union locala dels sindicats obrièrs C.G.T. de 1911 a 1914 e puèi director del setmanièr Le Languedoc socialiste de 1921 a 1940. Foguèt mobilizat dins lo 258en R.I. quand comencèt la Primièra Guèrra Mondiala. Foguèt fach sargent sul camp de batalha e foguèt nafrat lo 21 d'agost de 1914 a Saint-Jean-de-Buzy (Meuse). Los alemands lo prenguèron e lo faguèron presonièr devant Montfaucon lo 21 de març de 1916.

Aprèp la fin de la guèrra se presentèt a las eleccions del 16 de novembre de 1919, sus la lista d'union socialista de defensa dels combatents e d'accion economica que capitanejava Edoard Barta, per tal de "denonciar totas las injustícias e prendre en man la defensa dels umils e dels interèsses viticòlas". Obtenguèt 27.820 vòtes sus 88.094 votaires e foguèt elegit al quocient electoral. Ben segur s'inscriguèt al grop socialista e foguèt membre de la commission del comèrci e de l'industria, de la de las begudas e de la de l'igièna, sa coneissença perfiècha dels problèmas del mestièr de viticultor li inspirèt son anar al Parlament e justifiquèt sas iniciativas e intervencions nombrosas, coma per exemple sus la destillacion des vins, la repression dels fraus, la reglementacion de la venda dels vins, l'assaniment d'aquel mercat important.