Montcarles

Montcarles (localament /muŋˈkaʀle/; en ligur monegasc: Monte-Carlu; en francés: Monte-Carlo; ancianament en occitan: Li Espelugas, en ligur monegasc: řë Speřüghe) es una anciana comuna, lo quartièr mai prestigiós dau Principat de Mónegue, e un ancian sector estatistic. Es celèbre per lo sieu casinò, li plajas, la mòda e per èsser estat elegit coma luec de residéncia de divèrsi personalitats famoï. La superfícia dau sector estatistic (de còps apelat Montcarles e Espelugas) era 295 392 m². Era divisit en 20 blòcs.^[1] Portava lo número estatistic 01.

Lu sectors de Mónegue abans 2013: Montcarles, en jaune, es lo sector que pòrta lo número 01

Montcarles

Monte-Carlo (fr)
Nom oficial	Munte Carlu (lij-mc)
Administracion
Geografia
43° 44′ 20″ N, 7° 25′ 31″ E
Estat	Mónegue
Comuna	Mónegue (comuna)
Quartièrs	Montcarles
Superfícia	0,28146 km²
Fus orari	UTC+01:00
Autras informacions
Còdi postal	98000
ISO 3166-2	MC-MC

Localizacion de la comuna de Montcarles dins lo principat de 1911 a 1917

Lu quartièrs de Mónegue : Montcarles, en jaune, es lo que pòrta lo número 02

Lo Casinò de Montcarles

La populacion dau quartièr es de 8 259 abitants.^[2]

Toponimia

Montcarles ten aqueu nom en onor dau prince Carles III de Mónegue despí lo 1r de julhet dau 1866. Aquela denominacion recenta s'adoptèt perque la consideravan coma pus adaptada a aqueu luec que li diïian avans Li Espelugas (en monegasc Ë Speřüghe). A partir de la sieu urbanizacion au sègle XIX e la fondacion dau Casinò, pensèron que lo vielh nom portava malastre perque en alemand Spelunke (pl. Spelunken) auria significat quauquarren coma "establiment dobtós".

Lengas

Montcarles (o ancianament «Li Espelugas») es un dei quartièrs dont si parla mai tradicionalament l'occitan niçard (en realitat, i a probable una transicion entre l'occitan niçard e l'occitan vivaroaupenc), ja que lo ligur monegasc si parla puslèu au quartièr centrau de La Ròca, segon li enquistas lingüistiqui de Carles de Tortolon e de Ramon Arveiller.

Activitats

Montcarles acuelhe lo Circuit de Montcarles, dont si debana lo Grand Prèmi de Mónegue de Formula 1. Finda aubèrga d'autres rescòntres coma aquelu de bòxa que valon per lo campionat dau mond, de defilats de mòda e divèrs eveniments.

Montcarles, durant de decennis, l'an vesitat de membres dei familhas reiali, d'estelas dau cinèma e de personas comuni. James Bond, l'espion britanic protagonista dei romans famós de Ian Fleming e dei filmes derivats, es, dins lo detalh, un client assidú dau casinò de Montcarles. En lo 1873, Joseph Jaggers venguèt l'òme que desvalisèt Montcarles en capitalizant sobre la descobèrta d'un desequilibri dins una dei ròdas dei taulas de rotleta dau casinò.

Quartièr o comuna?

Sovent creson que Montcarles seria la capitala dau Principat de Mónegue, mas tot lo principat si compaua de fach de la comuna unenca de Mónegue, e Montcarles es basta un quartièr d'aquela comuna. Es ver que creèron, a passat temps, una division de Mónegue entre diferenti comunas mas, encuei, i a una sola comuna unificada.

Imatges

Clicatz sus una vinheta per l’agrandir.

• 
  Lo Casinò de nuech
• 
  Montcarles
• 
  Montcarles
• 
  Montcarles
• 
  Montcarles