Occitània (region administrativa)

La region d'Occitània^{[nt 1]} (oficialament en francés: Occitanie;^[5] en catalan: Occitània)^[6] es una region administrativa francesa, creada per la reforma territoriala de 2014, de la fusion de Lengadòc-Rosselhon e Miègjorn-Pirenèus. Es entrada en vigor lo 1r de genièr de 2016 après las eleccions regionalas de la fin de 2015.

Pels articles omonims, vejatz Occitània (omonimia).

Region administrativa d'Occitània

Occitanie (fr) La Région Occitanie / Pyrénées-Méditerranée (fr) Occitània (oc)
(Bandièra) (Blason)
L'estanh de Laurenti en Arièja.
Nom oficial	Région Occitanie (fr)
Escais	Pyrénées-Méditerranée
Administracion
Capitala	Tolosa
Lenga oficiala	francés
• Autras lengas	occitan (lengadocian, gascon, provençal, auvernhàs) e catalan
Politica
• Presidenta del conselh regional	Carole Delga (2016–)
• Prefècte	Pierre-André Durand
Geografia
43° 42′ N, 1° 03′ E
Estat	França
Division territoriala francesa	França metropolitana
Superfícia	72 724 km²
Punt culminant	Vinhamala (3 299 m)
Fus orari	UTC+01:00 (ora estandard) UTC+02:00 (ora d'estiu)
Demografia
• Totala	6 080 731[1] ab. (1 de genièr de 2022 )
• Densitat	83,61 ab./km²
Autras informacions
ISO 3166-2	FR-OCC
Sit web	laregion.fr

Es limitròfa d'Aragon al sud-oèst, de Catalonha al sud, de Nòva Aquitània a l'oèst e al nòrd-oèst, d'Auvèrnha-Ròse-Alps al nòrd-èst e de Provença-Alps-Còsta d'Azur a l'èst. Se compausa de 13 departaments, gaireben totes completament de lenga occitana.

Denominacion

Un nom provisòri de la region, a sa fondacion en 2015, foguèt «Lengadòc-Rosselhon-Miègjorn-Pirenèus»: èra compausat dels noms de las doas regions fusionadas, Lengadòc-Rosselhon e Miègjorn-Pirenèus, dins l'òrdre alfabetic.

Lo 24 de junh de 2016, lo conselh regional se causiguèt lo nom francés d’«Occitanie» e tanben un nom segondari mai long que foguèt «Occitanie-Pyrénées-Méditerranée». Lo 28 de setembre de 2016, lo Govèrn Francés^[5] la nomenèt Occitanie sens precision.

La denominacion actuala a entraïnat de polemicas dins lo movement occitanista:^[7]

• D'unes crenhon que lo nom d'aquesta region administrativa faga desparéisser lo sens tradicional d’Occitània (lo grand territòri de la lenga occitana): se pensan que lo sentiment d'apertenéncia a Occitània es grèvament menaçat dins las autras regions de la granda Occitània tradicionala.
• D'autres, al contrari, se'n regaudisson perque pensan que i a, enfin, un usatge oficial e institucional del nom d’Occitània. Se pensan que lo nom d’Occitània serà mai conegut e mai revendicat dins las autras regions de la granda Occitània tradicionala.

En conclusion, aquesta region administrativa non engloba la totalitat d’Occitània.^[8]

Administracion

Division	Nombre
Departaments	13
Arrondiments	36
Cantons	249
Comunas	4453

Demografia

Definicion	Nombre
Populacion de la region	6 080 731
Populacion occitana	5 311 151
Percentatge occitan	87,34 %

Cultura

Províncias del sègle xviii:

     Lengadòc

     Guiana e Gasconha

     Comtat de Fois

     Rosselhon

Lo territòri actual d'Occitània es constituit de divèrsas regions istoricas: Lengadòc, Guiana, Gasconha, lo Comtat de Fois e la província de Rosselhon.

Durant l'Ancian Regim, las institucions dependevan essencialament del Parlament de Tolosa, fondat en 1443.

Sul plan cultural, la region es de tradicion latina e principalament axada cap a la peninsula Iberica, especialament amb los Païses Catalans e lo Bascoat.

Eraldica

Blasonament: «Sus escut francés ancian, escartairat, als tres primièrs de golas, al quatren d'aur a quatre pals de golas, cargat en son còr d'una crotz de Tolosa.» Comentaris: La crotz occitana e los pals aragoneses (aquestes essent egalament utilizats per Aragon, las Illas Balearas, Catalonha, la Comunautat valenciana e divèrs blasons en Occitània) son totjorn estats declinats dins los emblèmas dels territòris qu'an constituït la region administrativa Occitània. Lo blason novèl es una reactualizacion grafica de l'ancian blason de Lengadòc-Rosselhon. Foguèt adoptat pel Conselh regional d'Occitània en 2017 en seguida de son identitat visuala.

Vejatz tanben

• Conselh regional d'Occitània
• Occitània

Nòtas

1. Aquesta denominacion es controversiada per de rasons culturalas segon los movements occitanistas (cf. Denominacion) e catalanistas,^[2][3][4] ja los Pirenèus Orientals son majoritariament de la lenga e cultura catalanas. levat en Fenolhedés.