Georges Vaur

Georges Vaur, nascut lo 19 de setembre de 1920 e mòrt lo 11 de julhet de 2010 a Tolosa (Occitània), èra un comedian, cantaire, actor e umorista occitan conegut jos l'escais de Pirolet (en grafia francesa : Piroulet).

Dessenh del primièr Piroulet de 1917, personatge popularizat per l'interpretacion de Georges Vaur après 1957.

Georges Vaur es nascut dins lo barri Sent Çubran de Tolosa, mas passèt una bona partida de son enfança (fins a sos 13 ans) a Cadors (Gasconha tolosana) ont vivián sos pepins. Aquí, se passiona pel teatre en fasent de modèstes espectacles mai que mai en francés.

Après aver passat son certificat d'estudis, ven tipograf a La Despacha del Miègjorn de 1934 fins a sa retirada en 1980.

Abans la guèrra, foguèt correire ciclista amator.

Presonièr de guèrra, torna far de teatre en francés a Cadors a son retorn d'Alemanha, encoratjat per sa femna Claudine.

En 1947, fonda ambe qualques amics lo grop Les J4, ambe en particular la famosa cantaira lirica Mady Mesplé.

En 1949, empòrta lo concors de cant organizat per un estanquet tolosan dins la categoria comica. Es aital remarcat e fa sas debutas sus la ràdio Tolosa-Pirenèus en 1950, ont pendent 6 annadas animarà l'emission umoristica Capitole 50 de Marcel Davenay, e ont i lança lo duò Félix e Lavelse.

En 1956, Carles Molin, autor del personatge occitan La Catinou, torna especialament escriure per el lo personatge de Pirolet, e fa còp-sec una comèdia musicala, Sacré Piroulet !, que serà interpretada 420 còps. La primièra se debana lo 31 de març de 1957 a Senta Gabèla (Lauragués). La popularita de Georges Vaur pren alavetz de vam, e t'encadena aital las pèças Le Facteur de Cougourdon, Ça sent le pétrole, Oui, mon colonel e Adam et la poire.

Enregistra mantuns disques de cançons e de scenetas, mesclant francés, francitan e occitan, en particular la famosa Partida de rugbi (titolada tanben de còps Le rugby à Toulouse), sceneta en francitan jogada pel primièr còp a la television francesa lo 14 de genièr de 1973.^[1]

Participa a mai de trenta cinc films al cinèma e a la television francesa a partir de 1971, en particular L'été en pente douce de Gérard Krawczyk (film principalament rodat a Martras Tolosana, dins lo Comenge) e Milou en mai de Louis Malle (en partida rodat a Sent Lisièr deu Plantèr, dins lo Savés).

Filmografia

Annadas 1970

• 1973 : Il pleut toujours où c'est mouillé de Jean-Daniel Simon
• 1975 : Le Diable au cœur de Bernard Queysanne
• 1977 : Le Premier Voyage de Jacques Krier
• 1977 : Ça va pas la tête de Raphaël Delpard

Annadas 1980

• 1983 : La Palombière de Jean-Pierre Denis
• 1987 : L'été en pente douce de Gérard Krawczyk
• 1989 : Milou en mai de Louis Malle

Annadas 1990

• 1993 : Je t'aime quand même de Nina Companeez
• 1997 : Héroïnes de Gérard Krawczyk

Annadas 2000

• 2000 : Les Autres Filles de Caroline Vignal
• 2009 : Le roi de l'évasion de Alain Guiraudie