Puèja

Puèja (Piège en francés) es un airal o una region naturala de Lengadòc, situat principalament dins lo departament d'Aude e format de tucas, puèges e de penjals d'altitud variable.

Puèja

Tipe	Region
Localizacion
Estat	França

Geografia

Segon l'abat Savartés, Puèja seriá una partida de las Corbièras occidentalas ^[1], çò qu'es benlèu butar tròp a l'oèst aquel massís montanhós. Es en tot cas un ensemble de puèges molassics situats entre la plana de Lauragués (cap a Castèlnòu d'Arri) e los primièrs contrafòrts dels Pirenèus.
La delimitacion de Puèja es imprecisa. En mai del departament d'Aude, Puèja se contunha en Arièja en direccion de Mirapeis e benlèu en Nauta Garona.
L'abat Savartés la definís atal, implicitament per la partida audenca : un territòri, comprés dins lo Pagus Tolosanus, limitat al nòrd per Lauragués, a l'èst per Rasés, al sud per Forèst, a l'oèst per Garnagués. Correspond a l'ancian canton de Bèlpuèg, sense la partida occidentala, qu'es de Garnagués, a l'ancian canton de Salas d'Èrs e a una partida del de Fanjaus, mens la partida qu'èra de Rasés ^[1].
La concepcion de l'abat Savartés es istorica. Dins un sens al còp natural e tecnocratic, las nocions de Puèja e de Lauragués non son exclusivas e Puèja es quitament considerat coma la partida meridionala de Lauragués. Aquí una lista de las comunas de Puèja lato sensu, classada segon los ancians cantons d'abans 2015 :

• canton d'Alanha : Fenolhet de Rasés, Onós, Senhalens;
• canton de Bèlpuèg : Bèlpuèg, Causac, La Faja, Mairevila, Molandièr, Molevila, Puèg Aric e Le Pin, Puèglunar, Pèirafita, Planha, Sant Amanç, Sant Sarnin, Vilauton;
• canton de Castèlnau d'Arri-sud : Fendelha, Laurapuc, Mas Santas Puèlas, Miraval de Lauragués, Vilanava la Comtal;
• canton de Fanjaus : La Cassanha, Casalrenos, Fanjaus, Fonters, Gajan de la Selva, Genervila, Laurac, Orsans, Riboissa, Sant Gauderic, Sant Julian, Le Vilar (Savaric);
• canton de Salas d'Èrs : Baranha, Bèlflor, Cumièrs, Fajac de la Relenca, Gorvièla, La Lobièra Lauragués, Marquènh, Meservila, Montauriòl, Pairan, Santa Camèla, Sant Miquèl, Salas d'Èrs;
• canton de Mirapeis (Arièja) : Casal dels Bailes, La Pena, Malagoda, Mansas, Mirapeis (?), Santa Fe, Sant Felitz de Tornagat, Telhet, Vals;
• canton de Savardun (Arièja) : Gaudièrs ^[2].

• 
  Paisatge de Laurapuc, al nòrd de Puèja.
• 
  Paisatge penjalut de Telhet, al sud de Puèja.

Clicatz sus una vinheta per l’agrandir.

Toponimia

Las fòrmas ancianas son : Ipsa Pina, comprene Puia, en 968, In pago Tolosano..., in ministerio de ipsa Puia ^[1] (remarcar l'utilizacion de l'article « salat », ara desparegut).
Aquelas mencions pròvan que lo nom de Puèja es un deverbal del vèrbe pujar, « montar », çò que caracteriza plan una region naturala pus nauta que la plana de Castèlnòu d'Arri e, en teoria, d'altitud que s'elèva progressivament cap al sud.