Se canta

Se canta^[1] (var. Se chanta) es una cançon tradicionala occitana espandida dins tota Occitània. La tradicion l'atribuís a Gaston Fèbus (1331-1391).^[2] Es considerada coma l'imne occitan; I a un fum de versions, segon los dialèctes e las regions.^[3]

Se canta
Cobèrta de la particion d'una version de la cançon
Forma	imne nacional
Tonalitat	Fa magèr
Letra de	Gaston III de Fois-Bearn
Lenga originala	occitan e aragonés
País d'origina	Occitània e Aragon

Noms

Se canta^[1] (var. Se chanta) es conegut tanben jol nom Aqueras montanhas^[4] (var. Aqueras montanhas; Aqueras montinas ; Aqueres montanhes; Aquelei montanhas; Aqueli montanhas) o La font de Nimes^[5] (var. La fònt de Nimes; La hont de Nimes) o Montanhes Araneses.^[6]

Estatut

Una version adaptada, Montanhes araneses, es l'imne oficial de la Val d'Aran dempuèi 1993 segon l'applicacion de l'article 4 de la Lei 16/1990 de 13 de julhet.^[7]

Es tanben l'imne oficial de Tolosa FC en la siá version lengadociana dempuèi 2010.^[8][9]

Simbolica de la cançon

Se canta seriá en fait non solament un imne d'amor e de nostalgia envèrs la femna aimada, mas egalament, e sens dobte sustot, una cançon que fa secretament allusion a la celèbra Crosada contra los albigeses, lo rossinhòl simbolizant l'accés a la dimension mistica en çò dels catars, las montanhas e los obstacles materials e interiors entravant aquesta, l'amor per la femna aimada reenvia finalament a la quista de l'amor espiritual.^{[cal referéncia]}

Tèxte

Versions comparadas de diferentas versions
Version aranesa[10]	Version bearnesa	Version lengadociana[11]	Version provençala
Aqueres montanhes Que tant nautes son, M'empèishen de véder Mèns amors an o son.	Devath de ma fenèstra, Qu'i a un auseron, Tota la nueit canta, Canta sa cançon.	Dejós ma fenèstra, I a un aucelon Tota la nuèch canta, Canta sa cançon.	Sota ma fenèstra, I a un aucelon, Tota la nuèch canta, Canta sa cançon.
Nautes, se son nautes, Ja s'abaisharàn Es mies amoretes Que s'aproparàn.	Se canti, jo que canti, Canti pas per jo, Canti per ma mia Qu'ei a luenh de jo.	Se canta, que cante, Canta pas per ieu, Canta per ma mia Qu'es al luènh de ieu.	Se canta e recanta, Canta pas per ieu: Canta per ma mia Qu'es au luènh de ieu.
Montanhes araneses A on es pastors Es hònts regalades Tròben, e jordons.	Aqueras montanhas Que tan hautas son, M’empachan de véder Mas amors on son.	Aquelas montanhas Que tan nautas son, M'empachan de veire Mas amors ont son.	Aquelei montanhas Que tant autas son, M'empachan de veire Meis amors ont son.
Se cantes, perqué cantes? Cantes pas per jo, Cantes per ma hilha Que non ei près de jo.	Baishatz-ve, montanhas, Planas, hauçatz-ve, Tà que pòsqui véder Mas amors on son.	Baissatz-vos, montanhas, Planas, levatz-vos, Per que pòsca veire Mas amors ont son.	Autas, ben son autas, Mai s'abaissaràn, E meis amoretas Vèrs ieu revendràn.
Montanhes coronades Tot er an de nhèu, Tan nautes e bères Que vos pune eth cèu.	Aqueras montanhas Que s'abaisharàn E mas amoretas Que pareisheràn.	Aquelas montanhas Tant s'abaissaràn, Que mas amoretas Se raprocharàn.	Baissatz-vos, montanhas, Planas auçatz-vos, Per que pòsque veire Meis amors ont son.
Montanhes araneses Pientades de rius, De totes grandeses Vos adorne Diu.	Se sabèvi las véder, On las rencontrar, Passarí l'aigueta Shens paur de'm negar.		A la fònt de Nimes, I a un ametlièr Que fa de flors blancas Au mes de janvièr.
Nòsti amors veiguéretz Com rosèr florir, Volem com es pares, Guardant-vos morir.	Las pomas son maduras, Las cau amassar E las joenes hilhas, Las cau maridar.		S'aquelei flors blancas Èran d'ametlons, Culhiriáu d'amètlas Per ieu e per vos.
			Se canta e recanta, Canta pas per ieu: Canta per ma mia Qu'es auprès de ieu.

Dins d'autras lengas

En aragonés

I a multiplas versions aragonesas de la cançon:

• la primièra "Aqueras montanyas" que foguèt cantada pel cantautor Jose Antonio Labordeta
• "Aqueras montañas" es tanben una adaptacion pel grop Biella Nuei e notadament se'n tròba, en 2002, una interpretacion per Biella Nuei y amigos occitanos^[12]
• la segonda "Aquellas montañas" es una adaptacion pel grop Olga y los Ministriles (2020)

En francés

La cantaira Dorothée n'interpretèt una version en francés, S'il chante.

Ligams extèrnes

• Alidé Sans - Aqueres Montanhes - Estivada 2015
• Particion d'una varianta de la cançon legibla sus Occitanica
• Vidèo Nadau - Aqueras montanhas (Olympia 2010)
• Aria MIDI, paraulas e traduccion en francés, e particion
• Bibliotèca nacionala de França. «Colleccion de cançons en occitan».
• Joan francés Tisnèr perpausa una version d'Aqueras montinas dins la creacion de 2010 Sorrom borrom ou le rêve du Gave [Las paraulas dins Vila de Pau Sorrom Borrom Vila de Pau], poèma epic, escrit per Sèrgi Javaloyès.