Tèrra Amata

Tèrra Amata es un site arqueologic de fòra suls penjals del mont Boron a Niça a 26 m en dessús del nivèl actual de la mar. Donèt de rèstas del Paleolitic inferior (Aqueulean) e mai un dels pus ancians fogals d'Euròpa.

Non confondre amb Terra Amata.

Reconstitucion d'una cabana de Tèrra Amata segon la proposicion primièra de H. de Lumley.

Principalas descobèrtas

Descobèrt pendent d'òbras de terrassament en 1966, foguèt escavat per una equipa capitanejada per Henry de Lumley pendent una de las primièras escavacions preventivas organizadas. Las interpretacions de las donadas arqueologicas de Tèrra Amata son fòrça diferentas segon que se referissèm als trabalh de Lumley^[1][2][3] o a aqueles de Paola Villa, que consacrèt une partida de son doctorat al site^[4].

Segon H. de Lumley, los nivèls arqueologics (ensems C1a e C1b) correspondon a mai d'un « sols d’abitats » superpausats de l’« Aqueulean ancian » sus una plaja fossila. Serián de 380 000 ans abans uèi. La reparticion dels rèstas arqueologics e dels elements naturals traduiriá la preséncia de cabanas amainatjadas sus la plaja. L’industria litica mesa al jorn, de calcari silicificat e de selze, se sosdividís en doas serias:

• l’industria de la « plaja », marcada par l’emplec subretot de còdols coma supòrts d’espleches. Aquels espleches compòrtan fòrça còdols talhats, qualques bifàcias parcials atipics e de picas trièdricas unifàcias de basa reservada, dichas dempuèi « picas de Tèrra Amata » ;
• l’industria de la « duna », d'espleches pichons amb d'esclats pus abondants (raclaires, denticulats, etc.) ^[5].

Segon H. de Lumley, las doas serias presentan pasmens fòrça analogias e son presentadas ensems.

Mai recentament, P. Villa demostrèt fòrça plan, subretot en tornant realizar los montatges e apariaments entre nivèls diferents, que lo gra de preservacion del site de Tèrra Amata èra estat largament subrestimat, que las ipotèsis fasent intervenir de cabanas èran improbablas e que los nivèls arqueologics se podián pas considerar coma unitats independentas. Prepausèt tanben de baissar l'edat de las serias aqueuleanas, que datarián de prèp de 230 000 ans abans uèi^[6][7][8][9].

Musèu de Tèrra Amata

Una partida dels rèstas es presentada dins lo quadre d'un musèu del site, lo Musèu de Paleontologia Umana de Tèrra Amata.