The Legend of Zelda

The Legend of Zelda^[1], o simplament Zelda, es una seria de jòcs videos d'accion-aventura producha per la companhiá japonesa Nintendo e creada per Shigeru Miyamoto e Takashi Tezuka. Lo primièr jòc de la seria sortiguèt en 1986 sus la consòla NES. Ara, vint-e-un jòcs forman la saga principala e sortiguèron tanben mantunas reedicions, remakes e jòcs derivats. Comptava 93,73 milions d'unitats vendudas dins lo monde a la fin de 2018 e èra una de las serias mai popularas de Nintendo amb Super Mario e Pokemon.

Desvolopament

Influéncias

The Legend of Zelda foguèt subretot inspirada per las passejadas de Shigeru Miyamoto dins la campanha a l'entorn de son ostal d'enfança a Kyoto, ^[2] ont veguèt de bòsques, de lacs, de caunas e de vilatges rurals. Segon Miyamoto, una de sas experiéncias mai memorablas foguèt la descobèrta d'una cauna al mitan dels bòsques. Après qualques esitacions, dintrèt dins la cauna e l'explorèt amb l'ajuda d'una lantèrna. Aqueste sovenir influencièt mai tard lo sieu trabalh, que l'exploracion de las caunas es una partida importanta dels jòcs Zelda. La mitologia celtica, la mitologia nòrdica e la mitologia japonesa^[3] influencièron tanben la seria tant coma la cultura medievala occidentala. Miyamoto considèra The Legend of Zelda coma un « jardin en miniatura » que se pòt jogar.

Takashi Tezuka desvolopèt lo decòr e escriguèt lo scenari. S'inspirèt de l'obra Lo Senhor dels Anèls de J. R. R. Tolkien.

Títol del jòc

Quand descobrèt que l'esposa de l'escrivan Francis Scott Fitzgerald s'apèlava Zelda, Shigeru Miyamoto decidèt de li rendre omenatge en donant aqueste nom a sa princessa, e lo títol The Legend of Zelda^[4] al jòc.

Descriguèt la concepcion del jòc dins lo libre The Legend of Zelda: Hyrule Historia : Miyamoto aguèt l'idèa de "The Legend of …" mentre que lo nom de Zelda li foguèt prepausat per un cargat de projèctes marcaticas, lo qual aguèt l'idèa de jónher un libre de contes al jòc. Demest sas proposicions, i aviá lo nom de Zelda per la princessa. Li diguèt:

«Als Estats-Units, i a una femna plan coneguda, esposa d'un escrivan, qui porta lo nom de Zelda. Que pensetz d'aqueste nom per nomenar aquesta joventa princessa a la belesa etèrna ?»

Lo projècte de libre non foguèt pas retengut, mas Miyamoto decidèt de conservar lo nom, amb l'acòrdi del cargat de projèctes.

Ligams intèrnes

• Nintendo

Bibliografia