Ugarit

Ugarit es una ciutat antica d'Orient Mejan situada sus lo litorau de la Siria actuala. Foguèt la capitala d'un pichon estat reiau situat sus una crosiera importanta dau comèrci internacionau de l'Antiquitat, au limit entre lei zònas d'influéncia de Mesopotamia, d'Egipte, d'Anatolia e de la Mar Mediterranèa.

Esquèma generau de la destruccion d'Ugarit durant la crisi dei Pòbles de la Mar.

La premiera mencion de la vila foguèt descubèrta dins leis archius diplomatics de Mari de 1810-1760 avC. Ugarit èra alora vassala dau Reiaume de Yamkhad, un estat centrat sus la vila d'Alèp. Après l'afondrament dei dinastias amorritas a la fin dau sègle XVI avC, lei mencions seguentas datan dau sègle XIV avC. La vila èra d'ara endavant plaçada sota la senhoriá egipciana. Passèt rapidament sota lo contraròtle deis Ititas que someteguèron lo nòrd de Siria. De revòutas se debanèron còntra aquela dominacion, mai Mursili II capitèt de restablir la preséncia itita dins la region. Puei, coma la màger part dau reiaume itita, Ugarit foguèt destrucha e pilhada per lei Pòbles de la Mar a la fin dau sègle XIII avC ò au començament dau sègle XII avC.

Istòria

Absenta de la documentacion escricha dau milleni III avC, Ugarit es mencionada per lo premier còp dins leis archius de Mari (v. 1810-1760 avC) e d'Alalakh (sègle XVII avC)^[1]. La vila foguèt benlèu l'objècte d'una refondacion vèrs 1800 avC pe un grop d'Amorritas^[2]. Èra d'aqueu temps una ciutat vassala d'Alèp e una importanta crosiera dau comèrci internacionau^[3].

Après lo declin d'Alèp, Mitanni prenguèt benlèu lo contraròtle de la vila, mai aquò es pas confiermat per lei documents e elements disponibles. En revènge, Ugarit passèt d'un biais segur sota la senhoriá egipciana durant lo rèine d'Amenhotep III (v. 1391-1353 avC). Pasmens, aqueu periòde egipcian durèt gaire car leis Ititas ocupèron lo nòrd de Siria durant la segonda mitat dau sègle XIV avC. Ugarit foguèt alora integrada dins la ret de vassaus deis Ititas e sei caps participèron desenant a la politica dau Reiaume Itita.

Vèrs 1185 avC, Ugarit foguèt destrucha e pilhada durant la crisi dei Pòbles de la Mar^[4]. Lei cronicas egipcianas accusan aquelei pòples de la destruccion, mai ges d'element exterior permet de confiermar aquela informacion. Au contrari d'autrei sites devastats durant aqueu periòde, Ugarit foguèt definitivament abandonada après sa destruccion. Lei rasons d'aquela chausida son desconegudas.

Lo site arqueologic

Lo site d'Ugarit foguèt descubèrt en 1928. Relativament ben conservat, foguèt l'objècte de plusors campanhas de recèrca arqueologica. Aquò permetèt de desgatjar lo plan de la vila durant la partida finala de l'Edat dau Bronze (1600-1185 avC). L'urbanisme i sembla largament anarquic, mai plusors elements organisators son estats destriats coma un acropòli, un pònt-restanca e una ret de fondacions permetent de compartimentar d'illas d'abitacion. La partida occidentala dau site es dominada per un complèxe palatau fortificat de 10 000 m^2[5]. La partida orientala es dominada per l'acropòli e per lei dos santuaris principaus dedicats a Baal e a Dagan^[6]. Lo rèsta es ocupat per l'abitat, per una ret desvolopada d'infrastructuras idraulicas e per de zònas de sepulturas. D'un biais curiós, ges de quartier especializat dins una activitat donada es estat identificat^[7].

Ugarit es tanben coneguda per seis archius compausats de plusors miliers de tauletas redigidas en cuneïfòrme. Dins lo palais, cinc ensembles diferents foguèron descubèrts. Cada ensemble sembla constituït de tèxtes especializats mostrant l'existéncia de divisions administrativas, juridicas e diplomaticas. D'archius privats foguèron tanben trobats dins la vila. An un caractèr mai escolar, literari e liturgic. En causa de la natura comerciala d'Ugarit, lei tèxtes descubèrts son escrichs dins de parlars variats. Au mens cinc sistèmas d'escritura e uech lengas diferentas son estadas identificadas dins lei tauletas. Leis escribas locaus desvolopèron un alfabet especiau, dich alfabet ugaritic, per transcriure una mena de còdi imaginat per lei foncionaris dau palais^[8]. Compausat de 22 consonantas, aquel alfabet s'inscriu dins lo quadre deis alfabets sinaïtics e aguèt benlèu un ròtle important dins la definicion de l'òrdre actuau dei letras.

• 
  Intrada fortificada de la zòna palatala
• 
  Bacin dins lo palais
• 
  Pèça dau palais
• 
  Roïnas dau temple de Baal
• 
  Vista d'una zòna residenciala
• 
  Exemple de canalizacion
• 
  Tauleta administrativa redigida amb l'alfabet ugaritic