Zine

Zine (nascuda Laurence Penzini; Tànger, Marròc, 1979^[1]) es una autora, compositora e cantaira occitana de Niça.

Zine

Biografia

Nasquèt a Tànger, ont passèt sas primièras annadas, d'un paire còrse e d'una maire originària de las Valadas occitanas^[2] Arriba en Occitània (Droma) als 5 ans. Sas primièras influéncias musicalas li venon dels parents e del regent de l'escòla Montessori de Tànger, un american qu'acabava las jornadas d'escòla en cantant amb la guitarra. Comença de compausar als 19 ans, puèi passa 2 ans a viatjar entre Occitània, Polonha, Soïssa e l'Illa de la Reünion. Se constituís aital una cultura musicala alargada, que las influéncias se retròban tre sas primièras creacions.^[3]

Participa a de festenals e de competicions coma lo Liet Internacional de las cançons en lengas minoritàrias de Ljouwert^[2][4] ont representa Occitània, o lo festenal polonés dels bardas (autors, compausitors, interprètas) en 2008.^[5]

En 2013 pareis son album "Folie douce" qu'es lausenjat per la critica.

Amb l'ajuda de Reinat Pèire Anfosso, adaptèt un fum de cançons conegudas en niçard ("Imagine" de John Lennon ven "Pantaia un pauc", "Redemption song" de Bob Marley ven "Cançon per curar", etc.) Son espectacle "Salade niçoise" utiliza aquelas creacions. Collaborèt ambe d'autres autors coma Tarik Lamirat, Reinat Toscano e Etel Adnan.

Emplega tanben la musica dins l'ensenhament del niçard^[6] que dona dins l'encastre de son mestièr de regenta, que li bailèt tanben l'escasença d'enregistrar de contes.^[7] Crea una cançon per Testadura, l'aucelon creat per Ollivier Lagrange.^[8]

Lo 5 d’aost dau 2016, participa a l’« acampada blanca » en omatge ai 86 victimas de l’atemptat dau 14 de julhet en cantant « Pantaia un pauc » e « Nissa la bella ».^{[9] [10]}

A la fin de 2016, participa a una cançon en solidaritat amb l'accion de mond de la Val de Ròia pels migrants.^[11]

En març de 2017 crea Lu baudos de l’OGIM, una adaptacion de la cançon de Jacques Dutronc, J’aime les filles e una video subre lu jogaires de l’OGC Niça.^{[12] [13] [14]}

Discografia

• Et la joie passera en funambule... sur le fil de la folie douce (2002, 15 títols, autoproduccion)
• Cherche (2004, amb La Quincaille, 4 títols, Palhassina Productions)
• Mon Coiffeur (2005, 5 títols, Gallomusic)
• Folie Douce (2013, 14 títols, La Candela-Seyrat, sus las platafòrmas de telecargament)
• Cantate d'Azur (2018, 27 títols)
• Palhassina Universala (2020, 36 títols)
• Folie Douce Face B (2020, 21 títols)

Ligams extèrnes

• Sit oficial de Zine
• Pagina de Zine sus Soundcloud
• Pagina de Zine sus Myspace