Bea Moedt

Bea Moedt (☆ 18 di yanüari 1950 na Rotterdam - † 26 di òktober 2024 na Kòrsou^[1]) tabata un fotógrafo hulandes residensiá na Kòrsou for di aña 1993.

Bea Moedt
Informashon básiko
Nasementu	1950
Fayesimentu	26 òktober 2024
Luga di deskanso	Kòrsou
Residensia	Kòrsou
Informashon profeshonal
Ofishi	fotógrafo
Otro informashon
Miembro di	Hollandse Hoogte
Imágen riba Wikimedia Commons
[Editá Wikidata] · [Manual]

Bida i trabou

Bea Moedt a lanta na Hulanda despues di guera, pero nunca a sinti su mes na kas einan. El a kasa ku Willem Moedt, kende tabata traha den konstrukshon. Ora ku el a lesa un anunsio di trabou den korant pa un mènèger di proyekto na Kòrsou, el a mira un oportunidat. Su kasá a haya e trabou i na 1993 nan a muda pa Kòrsou. Despues di tempu, su kasá a kuminsá su mesun negoshi.^[2]

Despues di a sufri un atake neurológiko (TIA) rònt di edat di 50 aña, el a kuminsá saka potrèt komo un forma di terapia pa yud’é kòrda kiko a pasa durante dia. Desde 2006 e tabata traha hunto ku Elodie Heloise i a kuminsá ku e sekshon "Dor di lens di Bea Moedt" na Cpost, un revista online di Memento Vivi ku a wòrdu publiká te ku 2012; Moedt ta proveé ​​un potrèt i Heloise ta skirbi un teksto kuné. El a bira un fotógrafo outodidáktiko, konosí pa korantnan, Kas Real di Hulanda, Curaçao North Sea Jazz Festival, Marina Real, Guardakosta, Aeropuerto Hato, KLM i hopi otro. Gobièrnu di Kòrsou a honr’e dor di emiti un seyo spesial di un di su pòrtrètnan for di den laira. Tambe el a gana vários kompetensia di fotografia^[3] i na 2015 a risibí pa su trabou e premio grandi Paul Huf.^[2]

Estatua di Bea Moedt na Arco Cavent

Moedt tabata sufri di un mal estado di salú i na mart 2022 a wòrdu bisá ku e no tabatin muchu tempu pa biba. Su salú a deteriorá asina tantu ku e no por a keda kas mas i el a muda pa e hospisio Arco Cavent. Abrumá pa e bon kuido, el a kuminsá un kampaña di finansiamentu publiko pa e hospisio riba Facebook, pa asina mas hende terminalmente malu por tin akseso na e forma spesial di kuido ku e hospisio ta ofresé. El a post un potrèt di su mes ku Barry Hay i pa cada ‘like’ di e post el a hasi donashon di sinkuenta cen. Despues el a disidí di traha un buki ku su potrètnan mas impresionante. E entrada generá pa e buki, Curaçao – My lasting love affair, ta benefisiá kompletamente Arco Cavent.^[4][5][6]

Bea Moedt a fayesé den e hospisio na e edat di 74 aña. E wèpsait di su fundashon ta bisa: “Su fotografia ta e legado ku e ta laga atras pa kòrda nos kon spesial bida ta”.^[7]

El a traspasá e derechonan di su potrètnan pa Fundashon Bea Moedt. E entrada ta benefisiá organisashonnan karitativo ku ta duna bèk na komunidat.^[2]

Na mart 2024, un estatua a wòrdu lanta pa Bea Moedt den Arco Cavent, trahá pa e artistanan lokal Melissa Josefa van Curamore i Siegmond van Lamoen.^[8]