Partido Demokrat

Partido Demokrátiko (DP), den boka di pueblo Partido Demokrat, ta un partido polítiko históriko na Kòrsou i e partido polítiko mas bieu ku ainda ta eksistí na e isla. Desde kreashon di Parlamento di Kòrsou na 2010, e partido no a logra optené representashon parlamentario i no a partisipa den e elekshon di 2017 ni di 2025.

 E artíkulo aki ta skirbí na ortografia di papiamentu. Lo ta apresiá si por mantené e artíkulo aki na estilo di papiamentu.

Partido Demokrat
DP
DP markando 60 aña di eksistensia.
Personanan
Lider di partido	Daniel Hodge
Fundadó	Efraïn Jonckheer Ronchi Isa
Historia
Fundashon	1944
Informacion basico
Aktivo na	Kòrsou
Posishon polítiko	Sentrista
Ideologia polítiko	Liberalismo
Koló	■ kòrá
[Editá Wikidata] · [Manual]

Historia

E partido a wòrdu fundá na 1944 pa Efraïn Jonckheer i Ronchi Isa. Na 1954, e aña ku Statuut pa Reino Hulandes a drenta na vigor, e partido a gana e elekshon pa Parlamento di Antias Hulandes i a goberna kasi soberano durante hopi aña, tin bes ku sosten di e partido arubiano PPA.

Banda di Kòrsou, DP tambe tabatin base di poder na Boneiru i na e islanan di Islariba (Sint Maarten, Sint Eustatius i Saba). Entre 1954 i 1968, Efraïn Jonckheer a sirbi komo Promé Minister di Antias Hulandes, birando e mandatario ku e termino mas largu den historia di henter Reino Hulandes te ku aña 2024, ora ku el a wòrdu surpasá pa Mark Rutte ku un diferensia chikitu di algun luna.

Aunke e partido a simbolisá stabilidat, e krísis sosial i e desigualdat di e époka a kousa malkontento grandi, ku a eksplotá den e lantamentu di 30 di mei 1969. Despues di e disturbio, e gobièrnu di DP a renunsiá. Den elekshon ku a sigui, DP a pèrdè su mayoria apsoluto, pero a keda e partido mas grandi i a formá un gobierno di unidat nashonal ku PNP i e partido nobo FOL.

Den dékada 1950, 1960 i 1970, DP tabata kontinuamente representá den Konseho Insular di Kòrsou, sea komo a partido mas grandi of e di dos mas grandi, ku eksepshon di elekshon 1975 ora el a bira partido number tres. Na elekshon 1967 el a saka un mayoria apsoluto di 13 di e 21 asiento.

For di fin di e añanan 1970, e partido a pèrdè gradualmente su liderasgo polítiko, i e divishonnan riba e otro islanan a separa i bai nan propio kaminda. Na Kòrsou mes, DP a sigui keda bai atras, spesialmente despues di e aparishon di partidonan nobo manera PAR. Den añanan 1990, e partido a desaparesé for di Parlamento di Antias Hulandes i Konseho Insular.

Na 2006, e aktivista sosial i ambiental Norbert George tabata lijsttrekker pa e elekshon di 20 di aprel di 2007, ku a resulta den un asiento, ku kua DP a regresa den Konseho Insular despues di 12 aña di ousensia. Sinembargo, den e siguiente elekshon di 27 di ougùstùs di 2010 — ku tambe lo a determiná konstelashon di e Parlamento di Kòrsou nobo — DP no a logra gana asiento.

E partido tampoko no a logra representashon den e elekshonnan di 2012 i 2016. Den 2016, e lista di DP tabata eksklusivamente formá pa hende muhé, ku Geraldine Scherperboer-Parris komo su lijsttrekker.^[1]

Un aña despues, e partido a keda ekskluí di elekshon di 28 di aprel 2017, despues di no a logra reuní e 792 voto di sosten pa validá su lista.^[2]

Na elekshon di 2021, DP a bolbe partisipa, ku Elsa Rozendal, yu muhe di ex-promé minister Boy Rozendal, komo lider di partido, pero sin logra sigura asiento.

Na yanüari 2025, e eks-promé minister Daniel Hodge, fungiendo komo lider di partido, a anunsiá ku DP lo no partisipá den e elekshon di 21 di mart 2025.^[3]

Lider di partido

Lidernan di DP ku a fungi komo promé minister di Antias Hulandes:

• 1954 - 1968: Efraïn Jonckheer
• 1968 - 1969: Ciro Kroon
• 1971: Ronchi Isa
• 1977 - 1979: Boy Rozendal

Otro lidernan tabata Norberto Ribeiro, George Hernandez, Geraldine Scheperboer, Elsa Rozendal i desde yanüari 2025 Daniel Hodge.