Smartphone
From Wikipedia, the free encyclopedia
Ä Smartphone (ausm Englische werdlisch iwwersetzt: schlaues Telefon) is e mobiles Telefon wu zusädslisch iwwer e Paked von charakterischdische Zusatzfunkzione verfischd, insbesonnere iwwer en Terminkallener, Noddizbuch, Adressbuch, Daschereschner sowie die Meschlischkait Faxe und E-Meils zu sende un zu empfange.
Schun des ersche Smartphone, des Simon vun de amerikonische Compjuterfirma IBM, des 1992 uff des Compjutermess COMDEX in Las Vegas, USA, vorgschdeldt worre is, un ab 1993 iwwer die US-Tefonfirma Bellsouth vertriwwe worre is, hodd iwwer diese Funktione verfischd. Ach kleene Compjuterschpiele konnt mer mit dem Simon schun schpiele.[1]
Inzwische (2009) sinn aus Smartphones Kleecompjuter worre, uf die ma e Vielzahl vun Progromme uffspiele konn. Hardwaremässisch verfieschen alle ach iwwer winzische Kameras fer Fotos und Filme. Naiere Smartphones erlauwe ach des Surfe im Internet.
Viele verfiesche ach iwwer des Sadeliddenavigationssystem GPS, so dass ma in Kombinatsion mit elektronische Karde ach soin geographische Standpunkt feschtstelle un sisch soin Wesch waise losse kann.
Die Oigawe kann de Nutzer tippischerwaise iwwer e winzische Zahle- un Buchstawwetastadur, zum Deel ausklappbar, odder iwwer en berihrungsempindlische Bildschirm, uff Englisch en Touchscreen, mache.
Newwee dem kleene Bildschirm, de beschränkde Laischdungsfähischkait vun Prozessor (Reschenoihait) un Informationsspaischer, is die schwierisch Oigab de Hauptnochdeel vun em Smartphone. Vun viele gschäzd wern se, wail ma mit em kleene, laischde Geräd, faschd iwweral unnerwegs elekronische Nochrischde empfange un versende kann un e rieschische Meng vun Informatione mit sisch fihre odder iwwers Mobilfunknetz ausm haimische Compjuter odder em Internet baischaffe kann.
Fer der Iwwerspiele vun Informazione verfische moderne Smartphones oft iwwer Funksignale odder Infrarotsignale wu vun viele Compjuder empfange werre kenne, wie Bluetooth.