Дрез, Карл
From Wikipedia, the free encyclopedia
From Wikipedia, the free encyclopedia
Карл Дрез (нѣм. Karl Drais; *29. апрѣль 1785 – †10. децембер 1851) быв нѣмецкый вынаходник, котрый вынайшов "машину на бѣганя" (Laufmaschine), котру тыж называли велоципед, або дрезина. Тота мала двоколесову конштрукцию, на котрой пак основѣ розвив ся бицикель ай моторка, и котра была первым персоналным возилом. Иншыма вынаходами Дреза были еще перва печатна машинка зоз клавиатуров, стенограф, млинець на мясо ай економный варич.
|
Карл Дрез | |
|---|---|
| Karl Drais | |
| KarlDrais.jpg | |
 | |
| Уроджѣня | Карл Фридрих Кристиан Лудвик барон Дрез фон Зауербронн 29. апрѣль 1785 Карлсруе |
| Умертя | 10. децембер 1851 (66 рокы) Карлсруе |
| Погреб | Головне кладовище Карлсруе, Alter Friedhof |
| Занятя | вынаходник |
| Горожанство | Велике герцогство Баден |
| Alma mater | Гайдельбергска универзита |
| Батько | Karl Wilhelm Ludwig Friedrich Drais von Sauerbronn |
| Вызначны роботы | велоципед |
Офиц. сайт | |
| VIAF:3265262; GND:118702459; LCCN:n85175736; FAST:159493; BNF:11991789g; NLKR/NLC:xx0030961;
| |
Карл Дрез, на крестне имя Карл Фридрих Кристиан Лудвик барон Дрез фон Зауербронн, родив ся 29.04.1785 в Карлсруе, главном городѣ Вельгерцогства Баден, Германия. Его отець, Карл Вилгелм Фридрих Лудвик барон фон Дрез, и мати, Ернестина Кристина Маргарета (роджена баронесса фон Калтенгал) были з небогатого, але высоко вплывного рода. Року 1810 отець Карла Дреза став ся Найвысшым Судцьом Вельгерцогства Баден. Карловым крестным отцьом быв маркгроф Карл-Фридрих Баденскый. До школы молодый Карл Дрез ходив в Карлсруе, де закончив и гимназию року 1800 и одышов до Пфорцгайму, учити ся в приватной лѣсницкой школѣ, котру провадив его стрыйко, Фридрих Гайнрих Георг фон Дрез, де он быв заедно и учительом. Еднак, роботу про молодого лѣсника рѣдко де мож было достати, про то записав ся до наукы на Гайделбергску универзиту, де штудовав математику, физику и архитектуру до року 1805. Наконець быв достав званя оберфоштера в року 1810, але не быв назначеный на конкретное мѣсто. И так зоставало до року 1811, коли младшый Дрез зостав увольненый од службы, але му была захована платня, и так пошов до Маннгайму обы ся в повности вѣновати роботѣ над вынаходами. Европа терпѣла од слабой уроды в роках 1812-1815, а на то року 1815, выбухнув вулкан Тамбора в Индонезии. Ерупция в Индонезии мала еффект на вшиток свѣт, а в Европѣ цѣлое лѣто мож было видѣти снѣг. Тото заставило Дреза задумати ся, як бы мож в транспортѣ заобыйти ся без кони, про недостаток кормива, и привело го до вынайдѣня року 1817 "машины на бѣганя", велоципеда.[1]
Дрез быв плодовитый вынаходник, котрого найвекшым дѣлом была "машина бѣгти" (Laufmaschine), названа изгодя велоципед. Она мала двоколесову конштрукцию, и на той основѣ пак вывинув ся бицикель ай моторка, и была она первым персоналным возилом. Тото быв прототип бицикля, без педал, але колеса мав на мѣдяных ховзных ложисках и мав инновачны тертьовы гамы.[2] Перва задокументована ѣзда одбыла ся 12. юна 1817 з Маннгайму до гостинця "Schwetzinger Relaishaus" в Райнау (днесь подгород Маннгайма), по найлѣпшой дорозѣ Вельгерцогства Баден. Тото было на одстояню около 7,5 км. Там обернув ся и вернув ся назад. Цѣла ѣзда забрала му около годины,[3] але найвекшов сензациов было, же стало ся то без коня. Еднак, коли велоципед выпустили на торг, стало ся очевидным, же на дорогах, порытых возовыми колеями, тяжко держати ровновагу машины, и так ѣздцѣ велоципеда имили ся ходити по ходниках и рухали ся над мѣру скоро, огрожуючи пѣшых ходцьох. Наслѣдком было, же власти в Германии, Великой Британии, Споеных Штатох заказали хосновати велоципед, што урвало тоту моду на многы рокы.[1]
Далшым вынаходом Дреза быв прототип печатной машинкы зоз клавиатуров (1821).[2] Позднѣй вывинув прототип стенографа, машинкы, што мала 16 симболох (1829).[2] Вынайшов пристрой на записованя клавирной музикы на папѣрь (1812),[2] первый млинець на мясо и економный варич (1834).[2] Вынайшов тыж два четыриколесовы возила, поганяны людсков мускулнов силов (1813/1814),[2] и другое з них было выставлено во Вѣдню на конгрессѣ о роздѣлѣ Европы по поражцѣ Наполеона. В далшых роках вывинув поганяный ногами желѣзничный кочик (1843),[2] котрый и понынѣ под назвов дрезина познатый на желѣзницях.[1]
Дрез мав одкрытя и математичны: найшов приблизне рѣшѣня ровниць n-го ступеня (1810), бинарный алгоритм калкулации квадратного корѣня (1813).[2]
Дрез не мав право продавати свои вынаходы про зыск, бо он мав статус штатного урядника в Бадену, хоть и быв плаченый без даякого урядного поста. Вельгерцогство не мало тогды патентный уряд, зато вельгерцог Карл Баденскый младшый даровав му вельгерцогску привилегию (Großherzogliches Privileg, 12. януар 1818), котра охраняла его вынаходы на 10 рокы в Бадену, а тыж удѣлив му почестну титулу Профессора механикы. Тота титула не была звязана з жаднов универзитов або иншов инштитуциов. Дрез лишив пост оберфоштера и достав пензию, котра му приходила яко державному уряднику.[1]
23. марца 1819 в Маннгайму штудент Карл Лудвик Занд забив писателя Августа фон Коцебу, котрого в фанатичных штудентскых кругах поважовали за российского шпиона. Штудента засудили на одсѣченя главы и стяли року 1820. Конзервативный отець Карла Дреза, Найвысшый Судця Вельгерцогства Баден одпер удѣлѣня милости забивцьови, а штуденты зачали за то его сына всягды преслѣдовати. То го донутило выѣхати року 1822 до Бразилии, де быв яко топограф з експедициов нѣмецкого природознателя Георга фон Лангсдорфа до року 1827. Року 1830 умер му отець.
Дрезовым нещастьом было, же поддержав револуцию и року 1848 публично зрек ся баронской титулы. По удушѣню револуции Прусы, новы паны Вельгерцогства Баден, збавили Карла Дреза пензии, мотивуючи тым, же грошѣ суть потребны на заплачѣня шкод, учиненых револуциов.
Карл Дрез умер без копѣйкы в кешени 10.12.1851 в Карлсруе.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
